قر تٶتەنشە جاعداي كوميتەتٸنٸڭ تٶراعاسى ۆلاديمير بەككەر ارىستا ەلٸ دە 1300-گە جۋىق ساپەر جۇمىس ٸستەپ جاتقانىن ايتتى, دەپ حابارلايدى قازاقپارات تٸلشٸسٸ.
ورتالىق كوممۋنيكاتسييالار قىزمەتٸندە ٶتكەن بريفينگتە ۆلاديمير بەككەر تەمٸرجول بويىنان جارىلماعان سنارياد تابىلعانىن ايتتى.
«ساپەرلٸك بٶلٸمشەلەردەن 1287 ادام 80 توپقا بٶلٸنٸپ, ارىس اۋماعىن تازارتىپ جاتىر. بٷگٸنگە دەيٸن 11 400 وق-دەرٸ مەن بٶلشەك تابىلعان. قالانىڭ بٸرنەشە جەرٸندە ٶرت بولعانىن بٸلەسٸزدەر. سوندىقتان بەيساۋات سناريادتاردىڭ جارىلۋ قاۋپٸ تٶمەن. ولاي ەكەن دەپ ساقتىقتى جوعالتۋعا بولمايدى. ارىستىقتارعا سنارياد بٶلشەكتەر كەزدەسسە, نە ٸستەۋ كەرەكتٸگٸ جاپپاي تٷسٸندٸرٸلدٸ», - دەيدٸ كوميتەت تٶراعاسى.
سونداي-اق, ول ساپەرلٸك جۇمىستار كەزٸندە تەمٸرجول بويىنان تابىلعان جارىلعىش زاتتىڭ ٸسكە قوسىلعان قالپى جارىلماي قالعانىن ايتتى.
«تەمٸرجول توراپتارىن تازارتۋ كەزٸندە ماماندار جارىلماعان سنارياد تاۋىپ الدى. جارىلمادى دەگەنٸڭٸز بوماسا, ٶزدٸگٸنەن ٸسكە قوسىلىپ قالعان. مۇنى كٶرگەن ساپەرلاردىڭ ٶزدەرٸ دە قاتتى تاڭعالدى», - دەدٸ ۆلاديمير بەككەر.
ەسكە سالساق, قر قورعانىس مينيسترلٸگٸ كەشە ارىس قالاسىندا جارىلۋ قاۋپٸ جوق قارۋ-جاراق بٶلشەكتەرٸن جويۋ جۇمىستارىن باستاعان بولاتىن.
بۇعان دەيٸن تٷركٸستان وبلىسى ەكٸمٸنٸڭ ورىنباسارى جولدىمۇرات امانباەۆ اپاتتان زارداپ شەككەن ارىس تۇرعىندارىنىڭ ەرقايسىنا 100 مىڭ تەڭگەدەن تٶلەۋ ٷشٸن ەكٸ اپتانىڭ ٸشٸندە 44 مىڭنان اسا ادام تۋرالى مەلٸمەت جينالاتىنىن ايتقان بولاتىن. بٷگٸنگٸ تاڭدا بٷلٸنگەن 247 جەكە ٷي جٶندەلۋدە.
