Arys qalasyn jarylǵysh zattardan túgeldei tazartý jumystary jalǵasýda. Bul týraly Arys qalasy ákimdiginiń májilis zalynda ótken brifingte QR Qorǵanys ministrliginiń ókili Ermiian Biatov málimdedi, dep habarlaidy "Ult aqparat" oblys ákiminiń baspasóz qyzmetine silteme jasap.
Onyń sózinshe, qazirgi tańda turǵyndarǵa eshqandai qaýip joq.
Jýrnalisterdiń suraǵyna jaýap bergen QR Qorǵanys ministrilginiń ókili, Arys qalasynyń turǵyndarynan qońyraýlar tolassyz kelip túsip jatqanyn jetkizdi.
«Jalpy, búgingi tańǵa deiin 30 700 jarylǵysh oq-dári bólshekteri tabylǵan. Qazirgi ýaqytta osy tabylǵan fragmentter qaladan 60 shaqyrym tysqary ornalasqan arnaiy poligonǵa jetkizilgen. Aldaǵy ýaqytta onyń barlyǵy joiylady. Iaǵni, adam ómirine qaýipti emes» - dedi E. Biatov.
Áli de jarylysqa bailanysty qyzmettik tekseris júrip jatqanyn jetkizgen jaýapty basshylar oq-dári saqtalǵan qoimanyń kóshiriletinin taǵy da aityp ótti.
Aita keterligi, 17 sektor boiynsha barlyq úiler jóndelýde. Baspanalardyń búlingen shatyrynan bastap, jarylǵan qabyrǵalar men synǵan terezeler qalpyna keltirilýde. Qosymsha sektorlarǵa bólingen qyzmetkerler aqaý aktilerin túzýmen ainalysýda. Oblys pen aýdandardan 1500-den astam qurylysshy jumyldyrylǵan.
Búgingi tańda 700-den astam turǵyn úide jóndeý jumystary bastalǵan. 4 shildedegi aqparat boiynsha, Arys qalasynda 181 úidiń aqaýlary tolyǵymen qalpyna kelgen. Bul baǵytta jumystar jalǵasýda.
Arys qalasynyń ákimi Murat Qadirbektiń málimetinshe, búgingi kúni shaharda turǵyndar kúndelikti tirshiligine qaita oralý úshin barlyq jaǵdai jasalǵan. Qalanyń ishinde 30 shaqty dúken jumysyn bastady. 4 naýbaihana suranysqa sai nan pisirip, qyzmetine kirisken. Avtoparkter de tolyǵymen jumystaryn atqarýda. Sonymen qatar, jergilikti halyq ataýly áleýmettik kómek, jalaqy, zeinetaqy syndy tólemderdi túgel alýda.
