Túrkistan oblysy, Arys qalasynda «Balameken» shaǵyn aýdanynan 100 otbasy jańa baspanaǵa ie boldy, dep habarlaidy "Ult aqparat".
Saltanatty sharaǵa qatysqan Túrkistan oblysy ákiminiń orynbasary Qosman Aitmuhametov pen Bolat Ótemuratov Qorynyń direktory Marat Aitmaǵambetov, pen «Vernyi Kapital» kompaniialar tobynyń bas direktory Erlan Ospanov jańa qonys ielerine kiltterin tabys etti.
Qaiyrymdylyq qordyń esebinen boi kóterip, qoldanysqa berilgen úiler eki otbasyna laiyqtalǵan. «Dýpleks» tipti 50 úi tolyq aiaqtalǵan, ári as úi jihazy men turmystyq tehnikamen jabdyqtalǵan. Ár úidiń aýlasynda 10 sottyq jer telimi bar. Qalalyq infraqurylymǵa qosylǵan jańa shaǵyn aýdanda tas jol tóselip, aiaq joldar salynǵan. Balalardyń oiyn alańy ornatylyp, aǵashtar otyrǵyzylǵan. Jańa úi ieleriniń qýanyshymen bólisken oblys ákiminiń orynbasary Qosman Aitmuhametov birneshe úidi aralap shyǵyp, jańa qonys ielerin quttyqtady.
«Apattan keiin búkil qazaq eli Arys halqynyń qaiǵy-muńyn bólisip, qol ushyn sozdy. QR Prezidenti Qasym-Jomart Toqaev arnaiy kelip, halyqpen birge ekenin kórsetse, QR Premer-ministri eki apta saiyn kelip, Arystaǵy qurylys jumystaryn baqylaýdy nazardan tys qaldyrmady. Atqarylǵan aýqymdy jumystar el eńsesin kóterip, erteńgi kúnge degen senimderin arttyrdyArysta atqarylǵan aýqymdy jumystar el eńsesin kóterip, erteńgi kúnge degen senimderin arttyrdy», – dedi Túrkistan oblysy ákiminiń orynbasary Qosman Qaiyrtaiuly.
Dendrobaq janynda ornalasqan jańa shaǵyn aýdannyń qurylysyna qaiyrymdylyq qory 850 mln teńge bólgen. Jańa baspanalar Arystaǵy jarylystan buzylǵan úi ielerine, kópbalaly jáne áleýmettik az qamtylǵan otbasylarǵa, turǵyn úige muqtaj múgedek jandar men jalǵyz basty analarǵa berildi.
«Búkil Qazaqstan Arysta oryn alǵan oqiǵaǵa kúizeldi, elimizdiń kóptegen uiymdary men azamattary qalaǵa jáne onyń turǵyndaryna qoldaý kórsetti. Biz de qalany qalpyna keltirýge óz úlesimizdi qosýdy uiǵardyq. Sondyqtan bizdiń Qorymyzdyń quryltaishysy baspanaǵa muqtaj qazaqstandyqtar úshin úiler turǵyzýǵa baǵyttalǵan «Balameken» jobasyn keńeitýge jáne jalǵastyrýǵa sheshim qabyldady», – dep atap ótti Bolat Ótemuratov Qorynyń direktory Marat Aitmaǵambetov.
Aita keteiik, bul joba Túrkistan oblysy ákimdigi men Bolat Ótemuratov Qorymen seriktestikte «Vernyi Kapital» kompaniialar tobynyń tabysty yntymaqtastyǵynyń nátijesinde júzege asyp otyr.
