Arys qalasyn qaita qalpyna keltirýge 126 qurylys kompaniiasy men 4 myńǵa jýyq jumysshy jumyldyryldy. Búginde jóndeýdi qajet etetin 7 163 nysannyń 7154-inde qurylys jumystary aiaqtalyp, ishki árleý jalǵasýda, dep habarlaidy "Ult aqparat".
Jarylystan japa shekken qalany qaita qalpyna keltirý jumystaryna elimizdiń barlyq óńirinen qurylysshylar tartyldy. Máselen, Túlkibas aýdany men Almaty qalasyna bekitilgen 14-sektorda 531 nysandy qalpyna keltirý jumysy júrip jatyr. Onyń ishinde 503-i jóndeý jumystaryn qajet etse, 28 úidiń qabyrǵalary tolyqtai súrilip, jańadan salynýda. Jumysqa 5 kompaniia, 300-den astam qurylysshy tartylǵan.
Al, Soltústik Qazaqstan oblysy men Ordabasy aýdanyna qarasty 13 sektorǵa bekitilgen 17 kóshedegi 371 turǵyn úidiń jaǵdaiyn zerdelep, zaqym kelgen 198 baspananyń jóndelýine kúsh salyndy. Sondai-aq, ataýly áleýmettik kómekke qujat rásimdeý úshin de tiisti mamandar bólinip, jumys júrgizilgen. Bul aýmaq boiynsha birjolǵy járdemaqy 18 jasqa tolǵan 954 turǵynǵa bank kartochkalary arqyly taratylyp berildi. Atalǵan sektorda qurylys nysandaryn qalpyna keltirý sharalary tolyǵymen aiaqtalyp, arystyqtar qonys toiyn toilap úlgerdi.
Osy óńirlerge qarasty sektordyń jetekshileri saltanatty shara uiymdastyryp, eleýli eńbek etken jumysshylar men belsendilerdi marapattady. Ádimdik ókilderi turǵyndardy úilerine baryp quttyqtap, olarǵa turmystyq tehnika syiǵa tartty.
Temirjolshylar qalasyndaǵy Jambyl oblysy men Shardara aýdanyna tiesili 3-sektordaǵy qurylys jumystarynyń aiaqtalýyna orai da saltanatty shara ótti. Jiynda Túrkistan oblysy ákiminiń birinshi orynbasary Qosman Aitmuhametov pen Jambyl oblysy ákiminiń orynbasary Erkebulan Daýylbaev Arys qalasyn qaita qalpyna keltirýge atsalysqan qurylysshylar men belsendi azamattarǵa alǵys aitty. Aitýly sharada Arys qalasyndaǵy qurylys-jóndeý jumystaryna belsene aralasqan qurylysshylar, merdigerler, belsendi azamattar men ákimdik qyzmetkerleri arnaiy alǵys hatpen marapattaldy. Shara aiasynda jarylys kezinde qirap, qaita salynǵan 4 úi saltanatty túrde ielerine tabystaldy. Bul úilerdiń ekeýi qaita salynyp, ekeýi tolyq jańǵyrtylǵan. Qurylysyn júrgizgen merdiger kompaniia atalǵan úi ielerine syi-siiapat jasady.
Aita keterligi, Arys qalasyndaǵy Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úimen birge 14 áleýmettik jáne kommertsiialyq nysan bar. Zerdeleýden ótken jeke turǵyn úidiń barlyǵynyń aqaý aktileri toltyrylyp, smetalaý jumystary jasalǵan. Nátijesinde qiraǵan 4 úi qaita salynyp, qalǵan 309 úige túrli jóndeý jumystary júrgizilip, qalpyna keldi. Bul jumystarǵa 4 merdiger kompaniia, 500-den asa qurylysshy tartylǵan. Tiisti shyǵyndar respýblikalyq biýdjet pen arnaiy qorǵa jinaqtalǵan qarjydan qarastyryldy.
Qaraǵandy oblysy men Tólebi aýdanyna tiesili 5 sektorda da qurylys jumystary der kezinde aiaqtaldy. Qiyn-qystaý sátte qoldaý bildirip, arystyqtarǵa demeý bolǵan №5 sektordyń ókilderi 11 kópqabatty úidiń 519 páterine jáne 72 jeke turǵyn úige jóndeý jumystaryn júrgizdi. Al, Atyraý oblysy men Jetisai aýdanyna qarasty №1-sektordyń aýmaǵy jarylys bolǵan áskeri bólimniń janynda ornalasqan. Kóktem shaǵyn aýdanynda ornalasqan aýmaqta 571 úidiń 468-i jóndeýden ótti. Onyń ishinde 55 úi qaita turǵyzylyp, 11 kásipkerlik nysan jóndelgen. Qurylysty barlyǵy 13 merdiger kompaniia júrgizdi. Jalpy qurylysqa 700-ge jýyq qurylysshy men 12 tehnika jumyldyrylǵan.
Eske salaiyq, Arys qalasyndaǵy zaqymdanǵan 7613 úidiń 7166-synda jóndeý jumystary júrse, 447 úi qaita salyndy.
