Aqmola oblysynyń politseileri Arystan kelgen balalarǵa Kókshetaý qalasynyń kórikti jerlerine saiahat uiymdastyrdy, dep habarlaidy "QazAqparat" oblystyq PD baspasóz qyzmetine silteme jasap.
Vedomstvonyń málimetinshe, shildeniń 10-y kúninde «Zvezdnyi» balalardy saýyqtyrý ortalyǵynda demalyp jatqan Arystan kelgen 20 bala politsiianyń bastamasymen Kókshetaý qalasynda bolyp, óńiriniń kórikti jerleri men tarihy oryndaryn aralap kórdi.
«Ekskýrsiia teńdessiz tarihi eskertkishteri saqtalǵan Kókshetaý qalasynyń tarihi murajaiyn aralaýdan bastaldy. Murajai qyzmetkerleriniń sózinshe, ǵimarattyń Buqpa taýynyń irgesinde ornalasýynyń ózindik tarihy bar, iaǵni, 19-shy ǵasyrdyń alǵashqy shireginde osy jerde Kókshetaý qalasynyń irgesi qalana bastaǵan. Kishkentai meimandar Kókshetaý qalasy qurylǵan ýaqyttan bastap, búgingi kúnge deiingi tarihi jádigerlermen tanysý múmkindigin aldy», - dep aitty vedomstvodan.
Sonymen qatar, Kókshetaý qalasynyń kórikti jerlerinde boldy.
«Buqpa taýynyń baýraiyndaǵy baqylaý alańynda, Aqmola oblystyq PD murajaiynda boldy. 1919 jyldan bastaý alatyn politsiia qyzmetiniń tarihymen tanysty. Murajai qorynda 5600-den astam jádiger saqtalǵan», - deidi PD baspasóz qyzmetindegiler.
Saiahat barysynda balalarǵa estelik syilyqtar tapsyryldy. Politsiia qyzmetkerleri «Dinamo» dene shynyqtyrý sport uiymymen birlesip, balalarǵa sporttyq jabdyqtar syilady. Al, saiahat sońynda kishkentai meimandarǵa balmuzdaqtar úlestirdi.
«Biz balalardyń Kókshetaý qalasy men Býrabai kýrortynda bolǵanynda jaqsy áser alýy úshin barlyq jaǵdai jasadyq. Ózimizde erekshe áserli kúide boldyq», - deidi PD JPQB iývenaldy politsiia tobynyń aǵa inspektory, politsiia maiory Ainagúl Qýandyqova.
Aita keteiik, Aqmola oblysynyń politseileri alǵashqylardyń biri bolyp Arys turǵyndaryna bir kúndik eńbekaqylaryn, iaǵni, 5 million teńgeden astam qarajat bóldi. Ishki ister organdary men ulttyq gvardiia ardagerleri keńesiniń qory jarty million teńge aýdardy. Sonymen qatar, óńir politseileri Aqmola oblysynyń lagerleri men balalardy saýyqtyrý ortalyqtarynda demalyp jatqan Arys balalarynyń qaýipsizdigin qamtamasyz etýde.
