QR Balalar quqyǵy jónindegi ýákil Arýjan Sain qazaqstandyqtardan kóshede qaiyr suraityn balalarǵa aqsha bermeýdi ótindi, dep habarlaidy "Ult aqparat".
«Dostar, kóshedegi balalar nemese balalary bar eresek tilemsekter týraly kóptegen habarlama men pikirler alamyn. Tilemsektikke zorlyqpen tartýdan balalardyń quqyǵyn qorǵaý boiynsha saýal daiyndap, keshendi sharalar qabyldaý úshin faktilerdi jinaýǵa kómektesýlerińizdi ótinemin. Balalar tipti, mektepke de barmaidy», - dep jazdy ol Instagram-daǵy paraqshasyna.
Arýjan Sain qaiyr suraǵan balaly eresekterdiń jáne balalardyń ózderiniń sýretterin onyń qai jerde (kóshede, jol boiynda, dámhana, meiramhanada) túsirilgenin, meken jaiyn jáne datasyn kórsete otyryp jiberýdi ótinedi. Sýretterdi +7 747 674 1554 nómirine WhatsApp arqyly jiberýge bolady.
«Politsiia, qamqorshy organ tarapynan qandai shynaiy sharalardy qabyldaýǵa bolatyndyǵyn túsiný qajet. Eń bastysy, Zúlfiia Baisaqova suhbatynda aitqandai, ázirshe bir ǵana ádispen kúresýge bolady: Barlyq qazaqstandyq aqsha bergendi toqtatýy kerek. Sadaqanyń osy tetigi jumys isteýin qoiǵan kezde bul balalar da tilemsektikke tartylmaidy. Sonymen qatar balaǵa kómektesý úshin balany jibermeýge nemese eresekter balamen qaiyr tilep júrgen jerde qalýǵa tyrysý qajet. Politsiiany shaqyryp, kútip, shaǵym jazý qajet. Tergeýshiniń jáne kámeletke tolmaǵandardy beiimdeý ortalyǵy qyzmetkerleriniń málimetterin alyp, balanyń taǵdyryn baqylaýda ustasańyzdar», - dedi ol.
