OQO-da zorlandy degen 7 jasar bala men onyń anasyn óz qaraýyna alǵan qoǵam belsendisi Arýjan Saiyn atalǵan istiń qalai júrip jatqandyǵy týraly óziniń Facebook paraqshasynda jazdy, dep habarlaidy sn.kz.
Onyń aitýynsha, qazirgi tańda QR Bas prokýratýrasy OQO-daǵy bilim bólimderine, OQO IID-ge jáne OQO prokýratýrasyna qatysty áreketsizdik, qylmysty jabý, qyzmetin asyra paidalaný derekteri boiynsha tekserý júrip jatyr eken.
"Biz qazir bul jaǵdai boiynsha óte kóp aqparat alyp jatyrmyz. Biraq, kóbi jalǵan aqparat bolyp shyǵýda. Bizge sondai-aq, kómek kórsetkisi keletin azamattardan óte kóp usynystar kelip jatyr. Sol kisilerdiń esebinen búginde balanyń anasyna jáne ájesine jáne zańdy ókiline bilet satyp alyndy", - dep jazdy qoǵam belsendisi áleýmettik jelidegi paraqshasynda.
Onyń aitýynsha, balanyń anasy Astanaǵa kelgennen bergi uiymdastyrý jumystarynyń bárin tanymal kásipker, "Ana úii" qoǵamdyq qorynyń basshysy Aidyn Rahymbaev óz moinyna alǵan. Sondai-aq, ana men balaǵa tanymal psiholog Gúlzat Asanova qoldaý kórsetip, qolynan kelgenshe kómektesip jatyr eken.
"Biz osynaý istiń Bas prokýratýraǵa ótkeni úshin alǵys aitqymyz keledi jáne ol barynsha shynaiy, kedergisiz jáne tek qana zań aiasynda júredi degen úmittemiz. Adamdar alǵashynda bul otbasyǵa kómektesemiz degende biz jaǵdaidyń dál osylai ýshyǵyp keterin oilaǵan joqpyz. Óitkeni, politsiia ájesi men nemeresin poiyzǵa mingizbei, kúshtep alyp ketkennen keiin bul jaǵdai baqylaýdan shyǵyp ketti, ásirese aqparattyq keńistikte. Isti dál bulai ýshyqtyrmaýǵa áý basta bolar edi, biz oǵan senimdimiz", - deidi Arýjan Saiyn.
Eske salaiyq, OQO Saryaǵash aýdany Abai aýylynda 7 jasar nemeresiniń bir emes birneshe ret zorlanǵany týraly shaǵym aitqan áje týraly maqala osydan bir apta buryn jariialanǵan bolatyn. Jergilikti gazette jariialanǵan maqalada aitylǵandai, 1-synyp oqýshysyn kórshi mekteptiń 7-8 synybynda oqityn birneshe bala ótken jyldyń tamyz aiynan beri zorlap kelgen kórinedi. Muny ájesine balanyń ózi aityp kelgen. Alaida, zeinetkerdiń sózinshe, onyń aryzyn ne jergilikti politsiia, ne mekteptiń direktory qabyldamaǵan eken.
