QR Bala quqyqtary jónindegi ýákil Arýjan Sain balalardyń shyǵarmashylyq jáne sporttyq úiirmeleriniń tegin bolýyn shektep turǵan kedergilerdi atady, dep habarlaidy QazAqparat.
Bilim jáne ǵylym ministrliginiń Facebook paraqshasynda Dúniejúzilik balalar kúnine orai «Balalyq shaqty qorǵaý júiesiniń tiimdiligi jáne balanyń ál-aýqaty: memleket pen azamattyq qoǵamnyń birigýi» taqyrybynda baspasóz máslihaty ótip jatyr. Sharada sóz bastaǵan Arýjan Sain balalardy jarqyn bolashaqqa jeteleý úshin Memleket basshysy Qasym-Jomart Toqaev naqty qandai tapsyrma bergenin qatysýshylardyń esine saldy.
«Prezident Qazaqstan halqyna Joldaýynda balalarǵa bilim men tárbie berý máselesine erekshe nazar aýdarǵan bolatyn. Ol árbir bala sporttyq, shyǵarmashylyq jáne óner úiirmelerimen qamtylýy kerektigin eskertken. Sebebi bul – bizdiń balalarǵa bilim men tárbie berýdiń, memleket úshin adam kapitalyn damytýdyń mańyzdy elementi. Biz bul máseleni sheshýge tyrysqanymyzben, ókinishke qarai, progress áli joq. Men ákimdikterge naqty talappen shyqtym, iaǵni olarǵa bilim salasyna bólinetin qarajattyń biraz bóligin balalar úshin tegin úiirmege jumsaý kerektigin habarladym. Bul hatty jan-jaqqa joldasam da, ázirge nátije joq. 2020 jyly naqtylanǵan biýdjetke bul máseleler esepke alynbady», - deidi Arýjan Sain.
QR Bala quqyqtary jónindegi ýákil naqty qajettilikke jumsalýǵa tiis qarajattyń bolmashy sharalarǵa baǵyttalyp jatqanyn aitady.
«Bizdiń árbir tiyn halyqtyń qajetine jumsalýy tiis. 6 million balamyzǵa memlekettik turǵyda júieli kómek kórsetilýi kerek. Qysqasy, jergilikti atqarýshy organdardyń zerdesi bar-aý degen úmitimiz jelge ushty. Biz Mádeniet jáne sport ministrliginiń ókilderimen naqty mehanizmder jolǵa qoiylýy kerektigi jóninde uzaq áńgimelestik. Óitkeni aqsha úiirme túrinde ár balaǵa jetýi kerek. Ókinishtisi, bul mehanizm áli qurylǵan da joq. Sondyqtan sarapshylarǵa júgindik. Olarǵa alǵysym sheksiz. Sarapshylardyń kómegimen memlekettik satyp alýlar týraly zańǵa ózgerister men tolyqtyrýlar engizýdi kózdeitin zań jobasy ázirlenip, ol qujatqa «shyǵarmashylyq satyp alý», «sporttyq satyp alý» uǵymdary engizildi. Sondai-aq mádeniet týraly zańǵa jáne sport týraly zańǵa balalar sporty men shyǵarmashylyǵy boiynsha satyp alý júieleri qalai naqty jumys isteitinin retteitin túzetýler ázirlendi», - dedi ol.
Arýjan Sain bul maqsattaǵy jumys respýblikalyq biýdjetten qosymsha qarajatty qajet etpeitinin jetkizdi. Bul másele ákimdikterden, mádeniet jáne sport basqarmalarynan bólinetin qarajattyń esebinen sheshiledi. Iaǵni bul qomaqty qarjy balalardyń múddesi men úiirmelermen qamtamasyz etýge jumsalady.
«Qazirgi ýaqytta bul zań jobasy Májilistiń qaraýynda. Úkimettiń qorytyndysyn kútip otyrmyz. Qujattyń tezirek qabyldanýynan úmitimiz zor. Bul zań osy jyldyń sońyna deiin qabyldanbasa, bizdiń ákimdikter taǵy da balalardyń múddesi eskerilmegen biýdjetti qabyldap jiberedi», - dedi ol.
