Kez-kelgen jaratylysta jan bar. Sebebi, jansyz nárse Alladan tys turady. Al biz musylman bolǵandyqtan Alladan basqa Táńir joqtyǵyna iman keltiremiz. Sondyqtan qalaiyq-qalamaiyq kez-kelgen jaratylystyń árýaǵy bolatyndyǵyna bas shulǵýǵa týra keledi.
Alaida osy basy ashyq máseleniń ózi bitispes daýǵa ulasyp jatady. Al biz buǵan Allanyń jaratý sipaty adamǵa da tán degendi qosyp aitamyz. Demek... Durys. Biz de jaratý quzyretine iemiz. Jalpy muny dindarlar negizinen joqqa shyǵarmaidy. Alaida keibir túitkildi máseleler turǵysynda kiltipandar bar dá. Sondyqtan biz shamaly táptishteńkirep aitqandy jón kórip otyrmyz.
Sonda biz ne jaratamyz? Ainalamyzǵa nazar salaiyq. Ainalamyzda adam balasy ielik etetin nársege kóz tunady. Soladyń bárin adam igiligine ainaldyrǵan bizbiz. Iá. Oǵan talas joq. Talas... Durys. Biz sol barlyq jaratylǵan nárselerde jan, iaǵni árýaq bar dedik. Eger olarda árýaq joq desek, onda olardyń shynaiy iesi, iaǵni Qudaiy biz bolyp shyǵamyz. Sondyqtan olarda árýaq bar degenge taǵy da eriksiz bas shulǵýǵa týra keledi. Bilgen jón. Qai zattyń da áýeli árýaǵy jaratylady. Jaratylar nárseniń keskini, sulbasy áýeli oida pisedi. Ol oi odan ári damidy, jetiledi. Bir sózben aitqanda, árýaǵy daiyn bolǵanda onyń sulbasy da kózge elestei bastaidy. Al qalǵany jái texnikalyq jumystar. Jolǵa shyqqan adam ekeý bolsa da bireýin basshy sailap alý qajettiligi týraly xadis bar. Sebebi, basshy sailaý arqyly álgi sapar árýaǵy jaratylady. Sondyqtan sailanǵan basshy sózi árýaq iesi bolǵandyqtan ústem bolady. Buryn ár aýylda aýzy dýaly qariialar bolǵan. Sebebi, ár aýyl adamy óz senimderin sol adamǵa artqan. Sondyqtan bir aýyl adamdarynyń senim qýatyna, iaǵni árýaǵyna ielik etetin álgi qariianyń duǵasy ámánda qabyl bolatyn. Soǵan orai bizdiń ata-babalarymyz qai isti de bastamas buryn áýeli bataǵa júginetin. Al ondai batagóiler "árýaqty adam" dep dáripteletin.
Al búgin... Iá. Árýaqty tárki ettik. Nátijesi - qaptaǵan Qudailar. Biz qazir ár sala tulǵalarynyń bárin bir-bir Qudaiǵa balaimyz. Sebebi ol adam ózi qol jetkizgen nárseniń iesi. Sondyqtan madaq Allaǵa emes, jeke adamdarǵa aitylady. Shyntýaityna kelgende onyń iesi - árýaq. Durysy - árýaqtaǵy Allalyq sipat. Al biz onyń áleýetine eshqashan mán bergen emespiz. Mán bermek túgili onyń ózin de joqqa shyǵardyq. Árýaq qyzmetin túisiný úshin áýeli ózimizde bolyp jatqan myna bir ǵylymi tujyrymǵa nazar aýdaraiyq.
Adamnyń denesi orasan zor zavod-fabrikalardan turady. Adamnyń denesi sansyz bólmelerden turatyn úlken ǵimaratqa uqsaidy. Bul úlken ǵimaratta san túrli fabrikalar jumys atqarady. Olar qyzmetinde esh kemshilik bolmaidy. Adam denesinde ár túrli jáne óte aralas formýladaǵy zattar óndiretin, túrli ximiialyq reaktsiialar quratyn, analiz jasaityn,emdeitin, tazalaityn, ýly zattardy joiatyn, jaralardy jazatyn, zattardy súzgiden ótkizetin, energiia beretin júie, elektr jelileri, basqarý júiesi, elektronikalyq kompiýter, xabar berý qondyrǵysy, mikroppen kúresý jáne olardy joiý júiesi bar. Júrek bolsa esh toqtamai istep turǵan bir nasos. Dene ǵimaratynda azyq qoimasy, qaýip-qater dabyly, jylytý júieleri, estý, kúsh-qýat, áskeri baza, radarlar, bólmeler arasyndaǵy joldar, tasityn kólikter, asxanalar, kanalizatsiia jelileri, observatoriialar, mazarat siiaqty qajetti mekemelerdiń bári bar jáne olar toqtaýsyz, ári múltiksiz qyzmet etýde.
Mine osy bizdiń erkimizden tys "ózdiginen" atqarylyp jatqan qyzmetter adam rýxy deneden shyqqan kezde toqtaidy. Búkil jaratylys, 18 myń álem de óz tynys-tirshiligin tap osylai toqtatady. Al odan keiin... Ol endi bólek áńgime.
Qudiiar Bilál,
Ult portaly
.jpg)