Foto: ashyq derekkóz
Qarjylyq monitoring agenttigi buqaralyq aqparat quraldarynan kelip túsken suraýlarǵa jaýap retinde «Qarmet» kompaniiasynyń quqyqtyq mirasqory bolyp tabylatyn «ArselorMittalTemirtaý» AQ múlkin jymqyrý faktisi boiynsha qylmystyq is tergelip jatqanyn málimdedi, dep habarlaidy Ult.kz.
Vedomstvonyń habarlaýynsha, atalǵan is aiasynda «AlbaStroiDor» JShS direktory S.G. Kimge qatysty tergeý amaldary júrgizilýde. Anyqtalǵandai, 2015 jyly «ArselorMittal Temirtaý» AQ men «AlbaStroiDor» JShS arasynda domna shlagyn qaita óńdeý týraly kelisimshart jasalǵan. Bul kelisimde qaita óńdeý qaldyqtaryna bilik etý quqyǵy qarastyrylmaǵan.
Alaida S.G. Kim óndiristik nysandarǵa erkin qoljetimdiligin paidalanyp, zaýyt aýmaǵynan domna qospasy men kesek shoiyndy júieli túrde jymqyrý shemasyn uiymdastyrǵan. Urlanǵan múlikti kedergisiz shyǵarý úshin qylmystyq shemaǵa ózara bailanysty kúzet uiymy — «Kúzet» JShS tartylǵan. Kompaniia qyzmetkerleri avtokólikterdiń is júzinde baqylaýsyz ótýine jaǵdai jasaǵan.
Tergeý derekterine sáikes, urlanǵan ónim S.G. Kimniń baqylaýyndaǵy «GlobalSpetsTorg» JShS jáne «TsentrOptSnab» JShS arqyly zańdastyrylǵan. Zańsyz áreketterdiń saldarynan jalpy quny 1,8 mlrd teńgeden asatyn 31 myń tonnadan astam ónim jymqyrylǵan.
Qazirgi tańda kúdikti S.G. Kim eki ai merzimge qamaýǵa alyndy. Sotqa deiingi tergeý jalǵasyp jatyr.
