QR Qorǵanys ministri Nurlan Ermekbaevtyń buiryǵymen qurylǵan arnaiy komissiia oq-dári qoimalaryn tekserýdi bastady, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Komissiia oq-dárilerdi saqtaý salasynda arnaýly tehnikalyq bilim men tájiribege ie joǵary bilikti áskeri mamandardan quralǵan.
Ol áskeri qyzmetshiler QR Qarýly Kúshteri quramalary men bazalaryndaǵy zymyran-artilleriia qarýyn, sondai-aq oq-dárilerdi saqtaýǵa bailanysty komandalyq laýazymdarda qyzmet atqarǵan. Sonyń ishinde QR QK Qurlyqtaǵy áskerler bas qolbasshysynyń orynbasary (2004-2005) laýazymyn atqarǵan zapastaǵy general-maior V. Nazarenko jáne QR QK Bas shtabynyń Uiymdastyrý-mobilizatsiia jumystary departamentiniń bastyǵy bolǵan (2016-2018) zapastaǵy general-maior M. Dairov bar.
Tekseris kezinde komissiia oq-dárilerdi saqtaý tártibin, jaǵdailaryn, órt qaýipsizdigi erejeleriniń saqtalýyn eskeredi. Budan bólek, jer-jerde is júzinde kómek kórsetilip, oq-dári saqtaý nysandarynyń qaýipsizdigin kúsheitý sharalary aiqyndalady.
