Qazaqstanda 470-ten astam áskeri mindetti arnaýly áskeri jiynǵa shaqyryldy, - dep habarlaidy QazAqparat.
Bul týraly QR Qarýly Kúshteri Bas shtaby basshysynyń orynbasary Serik Boranbaev aityp berdi.
«Qorǵanys ministrligi basshylyǵy aldyn ala qabyldaǵan uiymdastyrý-tehnikalyq sharalary men jergilikti áskeri basqarý organdarynyń, meditsinalyq qyzmetkerlerdiń karantindik shekteýdegi birlesken jumysy az ýaqytta arnaýly jiynǵa 473 áskeri mindettini shaqyrýǵa múmkindik berdi. Onyń arasynda 71 ofitser men 402 serjant jáne zapastaǵy sarbazdar bar. Olardyń basym bóligi - eriktiler», - dedi Serik Boranbaev Ortalyq kommýnikatsiialar qyzmetinde ótken brifingte.
Onyń aitýynsha, Qorǵanys ministrligi men Qarýly Kúshter Bas shtabynyń basshylyǵy ásker mindettilerdi shaqyrý barysyna, sanitarlyq-gigienalyq talaptar men áskeri tártiptiń saqtalýyna júieli baqylaý uiymdastyrdy.
«Arnaýly jiynǵa shaqyrý shaqyrý erejelerin halyqqa jedel túsindirý úshin Qorǵanys ministrligi men qorǵanys isteri departamentteri 4 sáýirden bastap, 18 Call-ortalyq uiymdastyrdy. Táýlik boiy jumys isteitin bul ortalyqtarǵa myńnan astam adam habarlasty», - dedi S. Boranbaev.
Sonymen birge, spiker ákimdikterdiń shaqyrýshylardy qajetti kiimmen, tamaqpen, qorǵanys quraldarymen, qajet bolǵan jaǵdaida turatyn orynmen qamtýǵa mindetti ekenin eske saldy.
Aita keteiik, 2 sáýir kúni Memleket basshysy Qasym-Jomart Toqaev áskeri mindettilerdi arnaýly jiynǵa shaqyrý týraly Jarlyq shyǵarǵan edi.
Qazirgi ýaqytta Nur-Sultan, Almaty qalalarynda, Almaty, Qyzylorda, Pavlodar, Aqmola oblystarynda arnaýly jiyn bólimsheleri quryldy.
Aqtóbe, Atyraý oblystarynda áskeri mindettilerdi shaqyrý jalǵasýda. 13 sáýir kúni Shymkent qalasy men Qaraǵandy oblysynda, 14 sáýirde - SQO, 15 sáýirde - Jambyl, 17 sáýirde - Túrkistan oblysynda shaqyrý bastalady.
Al BQO, ShQO, Qostanai jáne Mańǵystaý oblystarynda arnaýly jiyn ótkizý máselesi qarastyrylmaǵan.
