Armrestlingten álem chempionatynda jeńiske jetken ońtústikqazaqstandyq sportshylar marapattaldy. Shardara aýdanynyń ákimi Bolatbek Qystaýov jeńimpazdardy qabyldap, «Alǵys hattar» tabystady, dep habarlaidy Ult.kz tilshisi QazAqparat agenttigine silteme jasap.
Shardaralyq sportshylar Vengriiada ótken álem chempionatynda Qazaqstan quramasynyń sapynda óner kórsetip, qorjynǵa 5 altyn, 3 kúmis, 3 qola medal salyp qaitty. Aýylǵa úlken abyroimen oralǵan sportshylardy aýdan basshysy jeńisterimen quttyqtady.
«Senderdiń árbir jeńisterińe munda otyryp bizder airyqsha qýanyp otyrdyq. Qaisarlyq pen erekshe namys-jigerdiń arqasynda Qazaqstandy álemge tanytyp keldińder. Jeńisterińe qutty bolsyn aitamyn», - dedi Bolatbek Dúisenbekuly.
Aýdan basshysy dúbirli dodada altynnan alqa taǵynyp, álemniń úsh dúrkin chempiony bolǵan, sonymen qatar aýdanda tuńǵysh márte «Qazaqstanǵa eńbegi sińgen sport sheberi» ataǵyna beriletin mindettemeni oryndap kelip otyrǵan Nurdáýlet Aidarhanǵa qutty bolsyn aita otyryp, aqshalai syilyq tapsyrdy. Dál osyndai syi-syiapattar álem chempiondary Erdáýlet Sarybai, Nurhan Qadyr, Dáýren Ábsattar, Talǵatbek Rústembek, álem chempionatynyń kúmis júldegerleri Quralai Abdýlla men Lázzat Málikaidar, álem chempionatynyń qola júldegerleri Nurdáýlet Qadyr, Maǵjan Shámiev jáne Medet Orazbekov esimdi sportshylarǵa da tabys etildi.
Óz kezeginde aýdan basshysyna alǵysyn jetkizgen aýdandyq Atletizmnen balalar men jasóspirimder sport mektebiniń direktory Nurjan Tórequlov qol kúresshiler atynan Býdapesht qalasynda ótken álem chempionatynda Qazaqstan quramasyna jalpykomandalyq esepte II oryndy jeńip alǵany úshin berilgen Kýbokty aýdan basshysyna syiǵa tartty.
