Armeniiadan mashina ákelý barysyndaǵy alaiaqtyq áreket faktileri boiynsha tergeý júrgizilip jatyr. Bul jaiynda Qazaqstan Prezidenti Qasym-Jomart Toqaev informburo.kz aqparattyq-saraptamalyq portalyna bergen ekskliýzivti suhbatynda aitty, dep habarlaidy QazAqparat.
«Problema áli kúnge deiin ózekti bolyp turǵanymen kelisemin. Adam jolyn taýyp, kórshi elderden avtomobildi kóptep alyp keldi. Meniń tapsyrmammen Bas prokýratýra osy ahýalǵa quqyqtyq baǵalaý júrgizdi. Birqatar memlekettik qurylymnyń qyzmetine narazylyq bar. Buǵan qosa, jekelegen tulǵalar zańnamany buza otyryp jáne adamdardy aldap, munan zańsyz biznes quryp alǵan. Armeniiadan mashina ákelý barysyndaǵy alaiaqtyq áreket faktileri boiynsha tergeý júrgizilip jatyr», - dedi Memleket basshysy.
QR Prezidentiniń atap ótýinshe, EAEO boiynsha Qazaqstannyń keibir seriktesterimen ózara is-qimylda da birqatar másele bar. Qazirgi ýaqytta olarmen aldaǵy ýaqytta mundai problemalardyń qaitalanýyna jol bermeý úshin jumys júrgizilip jatyr.
«Úkimetke qazaqstandyq kólik ieleriniń múddelerin eskere otyryp, Armeniiadan ákelingen avtomashinalardy paidalanýdy retke keltirý boiynsha qosymsha uiymdastyrýshylyq sharalardy ázirleý tapsyryldy», - dedi Qasym-Jomart Toqaev.
