Armeniianyń Premer-Ministri Nikol Pashinian soǵysty toqtatý týraly qujatqa qol qoiǵanyn jariialaǵannan keiin Armeniia úkimeti ǵimaratynyń aldyna halyq jinaldy. Bul týraly ARMENPRESS agentigi habarlady.
Respýblika alańynda signal bergen kólikter ótip jatyr. Úkimet ǵimaratynyń aldyndaǵy jaǵdai ýshyǵyp tur.
Úkimet ǵimaratyna ondaǵan adam basyp kirdi. Politsiia qyzmetkerleri adamdardy ǵimarattan shyǵýǵa kóndirýde.
Premer-Ministr qabyldanǵan sheshim oǵan tym qiyn bolǵanyn, bul sheshim áskeri jaǵdaidy tereń taldaý nátijesinde, jaǵdaidy jaqsy biletin adamdardy baǵalaý nátijesinde qabyldanǵanyn atap ótti.
Úkimet úii aldyna jinalǵan adamdar Armeniia, Resei jáne Ázerbaijan basshylarynyń málimdemesiniń mátini áli jariialanbaǵanyna qaramastan, sheshimmen kelispeitinin bildirýde.
"Jerlerimizdi bermeimiz" dep urandatqan top azamattardy ózderiniń jaǵyna qosylýǵa shaqyrǵan. Oppozitsiia Pashiniannyń otstavkaǵa ketýin talap etti.
"Novosti Armenii" saitynyń jazýynsha, úkimet ǵimaraty ornalasqan kóshelerdi politsiia qorshaǵan.
Úsh memlekettiń basshylary qol qoiǵan kelisimge sáikes, Armeniia 20 qarashaǵa deiin "Agdam aýdany men Ázerbaijan Respýblikasynyń Gazah aýdanynda armian taraby baqylaýda ustaǵan aýmaqtardy" ázerbaijan jaǵyna qaitarýy tiis. Biraq Taýly Qarabaqpen bailanysyn úzbeý úshin Lachin dálizin (eni 5 km) saqtap qalady. Alaida dáliz Shýsha qalasynan ótpeidi. Aýmaqqa reseilik bitimger sarbazdar ákelinedi.
Osyǵan deiin ázerbaijan áskeriniń Taýly Qarabaqtaǵy birqatar aýmaqty baqylaýǵa alǵany, ózin respýblika jariialaǵan Taýly Qarabaq ortalyǵy Stepanakertke jaqyndap qalǵany jaily habar taraǵan edi.
Taýly Qarabaq resmi túrde Ázerbaijan aýmaǵy sanalady, biraq bul aimaqta etnikalyq armiandar turady. Taýly Qarabaqtaǵy armiandardy Erevan qoldap otyr. Ázerbaijan men Armeniia Taýly Qarabaq aimaǵy úshin 1988 jyldan beri qaqtyǵysyp keledi. 1988-94 jyldary arasyndaǵy soǵysta 30 myńdai adam qaitys boldy. 1994 jyly eki el qaqtyǵysty toqtatý týraly kelisimge qol qoiǵan. Sol ýaqyttan beri Taýly Qarabaq etnikalyq armiandardyń baqylaýynda. Taýly Qarabaq aimaǵy 1991 jyly táýelsizdik jariialap alǵan. Biraq olardy Armeniiadan basqa eshbir el moiyndamady.
Biyl 27 qyrkúiekte Taýly Qarabaq úshin qaqtyǵys qaita bastalyp, myńdaǵan adam qaitys boldy. Olardyń arasynda beibit turǵyndar da bar. Eki tarap úsh ret atysty toqtatý týraly kelisimge kelgenimen, bul kelisim saqtalmady.
Taýly Qarabaqtyń de-fakto úkimeti qyrkúiekten beri 1221 áskeri qaitys bolǵanyn málimdedi. Ázerbaijan soǵystan qansha sarbaz qaza tapqanyn aitpai otyr.
Eske salsaq, Taýly Qarabaqta atysty toqtatý týraly málimdemege qol qoiylǵan bolatyn.
