Ázerbaijan qarýly kúshterimen túngi qaqtyǵys kezinde Armeniianyń 49 áskeri qyzmetshisi qaza tapty, - dep habarlaidy Tengrinews.kz agenttigi Sputnik Armeniiaǵa silteme jasap.
Bul týraly Armeniia premer-ministri Nikol Pashinian málimdedi.
"Qazir Armeniianyń Qorǵanys ministrligi tarapynan 49 áskeri qyzmetker qaza tapqany naqtylandy. Biraq bul sońǵy kórsetkish emes, aqparatty naqtylaý qajet", - dedi Pashinian respýblika parlamentinde sóilegen sózinde.
Onyń aitýynsha, qazir shaiqastardyń qarqyndylyǵy báseńdegen. Ministrler kabinetiniń basshysy Bas shtab pen Qorǵanys ministrligi jaǵdai men qaza tapqandar sanyn baǵalap jatqanyn jáne rastalǵan aqparatty habarlaitynyn atap ótti.
"Qazir bir-eki baǵyt boiynsha Ázerbaijan tarapynyń shabýyly jalǵasyp jatyr", - dedi ol.
Eske salaiyq, 13 qyrkúiekke qaraǵan túni Armeniia men Ázerbaijan shekarasynda qaqtyǵys bastalǵan edi. Eki eldiń qorǵanys ministrlikteri qarama-qaishy aqparat taratyp jatyr.
Armeniia Qorǵanys ministrligi Ázerbaijan Qarýly kúshteriniń artilleriia men ushqyshsyz ushaqtar arqyly Armeniia territoriiasyn atqylai bastaǵanyn málimdedi. Al Ázerbaijan qorǵanys ministrligi armian áskeri aýqymdy arandatýshylyq jasady dep aiyptady.
