«Armanym oryndaldy»: Dimash Qudaibergenniń kontsertinde kózine jas alǵan meksikalyqtyń videosy jelide tarady

Foto: kollaj Ult.kz

Álemge áigili qazaqstandyq ánshi Dimash Qudaibergenniń Meksikadaǵy kontserti kezinde meksikalyq jankúierdiń kózine jas alǵan videosy áleýmettik jelide keńinen tarady, dep habarlaidy Ult.kz.

Beinejazbada er adam Dimashtyń oryndaýyna tolqyp, kóz jasyna erik bergen. Keiin ol bul sát týraly óz pikirin bildirip, emotsiiasynyń sebebin túsindirdi.

«Bul men úshin jai kontsert emes edi. Biz, meksikalyqtar men latinoamerikalyqtar, Dimashty kópten kútkenbiz. Sol sát – armanymyzdyń oryndalýy boldy. Men Dimashty 2018 jyly tanydym, onyń mýzykasy ómirimdi ózgertti. Sol sebepti, Dimashtyń meniń elimde án salýy – júregimdegi eń úlken armannyń oryndalýy», – dep jazdy jankúier.

Ol sondai-aq Dimash pen Qazaqstanǵa degen rizashylyǵyn bildirip, «Qazaqstan – meniń ekinshi Otanymdai» dep atap ótti.

Aita keteiik, Dimash Qudaibergenniń Meksikadaǵy kontsertteri eki kún qatarynan ótti. Ánshiniń jandy daýsymen oryndaǵan ánderi men áserli shoýy kórermenderdiń zor yqylasyna bólendi.

«Dimash baýyrym, sen endi meksikalyqsyń!» – dep túiindedi fanat óz jazbasyn.