Búgin marqum Arman Dúisenovtyń uly Abylai dúnieden ótkeni habarlandy. Jas jigittiń neden qaitys bolǵany ázirshe belgisiz. Prodiýser Baian Maqsatqyzy osy tragediiaǵa bailanysty BAQ ókilderi men ártisterge úndeý joldady.
Prodiýser Abylai ne máselemen oǵan júgingeni týraly baiandady.
"Arman Dúisenovtyń uly dúnieden ozdy. Imandy bolsyn! Bul óte qaiǵyly jańalyq. Abylai, Armannyń uly maǵan habarlasqan. Ómirinde bir ret, buǵan deiin eshqashan habarlaspaǵan. Maǵan habarlasyp, menen kómek surady. Ol maǵan eki saǵattan keiin telekanaldardyń birinde ákesi týraly baǵdarlama shyǵatynyn, oǵan shoýbiznes ókilderi qatysatynyn jáne baǵdarlama Arman týraly jáne olardyń otbasy týraly bolatynyn aitty. Baǵdarlamada aitylýy qajet emes dúnieler aitylmaqshy ekenin túsindim. Men oǵan aittym: «Abylai, eger sen maǵan keshe habarlasqanyńda, men bul máseleni rettei alar edim, biraq eki saǵatta retteý múmkin emes». Onyń jan dúniesi jylap jatty. Ol maǵan «Olar ákemniń atyna kir keltirýde» dedi", - dedi Baian Maqsatqyzy.
Osydan keiin Baian Maqsatqyzy ártisterdiń ómirin qazbalai bermeńder dep, BAQ ókilderi men ártisterge ótinishin jetkizdi.
"Men onyń neden qaitys bolǵanyn bilmeimin. Qazir men Aisulýǵa, anasyna baramyn. Ol da maǵan habarlasqan. «Baian, balamdy keshirshi. Men oǵan nege habarlasasyń dep urystym. Ol osy máselege qatty alańdap júr. Ol ákesin qatty jaqsy kóredi. Ol týraly esteliktiń bári oǵan aýyr tiedi», dedi. Armandy men jaqsy biletindikten, ulynyń qandai adam ekenin de bilemin.
Meniń jýrnalisterge jáne óner adamdaryna ótinishim bar. Ótinemin, bireýdiń syryn jurtqa jaiýdy doǵaryńdar. Óitkeni munyń artynda búlingen taǵdyrlar emes, úzilgen ómirler tur. Men ol balanyń neden qaitys bolǵanyn bilmeimin, qazir bilemin. Biraq bul taqyryp ol úshin aýyr jara bolǵanyn túsinemin. Ony ózgeler túrtpektep, odan saiyn aýyrta berdi. Bireýdiń ómirine qol suǵýdy doǵaryńdar, ótinemin!", - dedi prodiýser.
