«Qazkommertsbank» AQ Direktorlar keńesiniń jańa quramy DK tóraǵasyn sailady. Bul qyzmetke biraýyzdan táýelsiz direktor Arman Dýnaev laiyq dep tanyldy, dep habarlaidy Ult.kz tilshisi QazAqparat agenttigine silteme jasap.
«Men úshin bul úlken qurmet. Jańadan damý kezeńinde eldegi júiequraýshy bankterdiń birinde Direktorlar keńesin basqarý úlken kásibi sheberlikti talap etedi. Memlekettiń qoldaýy men banktiń negizgi aktsionerin almastyrý sharalary jinaqtalǵan kóptegen máselelerdi sheshýge múmkindik beredi. Qazirgi ýaqytta bizdiń aldymyzda mańyzdy maqsat tur. Ol - Qazkommertsbanktiń korporativtik basqarý júiesin halyqaralyq úzdik tájiribeler men Halyk Group qaǵidattaryna sáikes keltirý jáne qarjy institýty damýynyń jańa strategiiasyn jasaý», - dedi A. Dýnaev.
Arman Ǵaliasqaruly Dýnaev - tájiribeli ári kásibi qarjyger, ekonomika ǵylymdarynyń kandidaty. Memlekettik jáne jeke sektorda, sondai-aq qarjy naryǵynda jumys tájiribesi mol. Táýelsiz direktor retinde Halyk Group tobynyń birqatar kompaniialarynyń Direktorlar keńesiniń quramyna kiredi: «Qazaqstannyń Halyq Banki» AQ, «Halyk Finance» AQ jáne «Halyk-Life» AQ. «Altyn Bank» AQ («Qazaqstannyń Halyq Banki» AQ EB) Direktorlar keńesin basqarady.
Aita ketý kerek, 31 shilde kúni ótken alǵashqy jinalysta banktiń Direktorlar keńesiniń jańa quramy sailanǵan bolatyn.
Arman Dýnaevpen birge banktiń basqarý organyna Sáýle Kishkimbaeva, bas aktsionerdiń ókili - Áliia Qarpykova, táýelsiz direktorlar - Azamat Joldasbekov pen Asqar Elemesov, sondai-aq QKB-nyń basqarma tóraǵasy laýazymyndaǵy Ýlf Vokýrka kirdi.
