Arktika álemniń azdaǵan lastanbaǵan jerleriniń qataryna engenmen, onda jaýǵan qardyń quramynda plastiktiń mikroskopiialyq bólshekteri bar. Buny nemis jáne shveitsar ǵalymdary anyqtady, dep habarlaidy QazAqparat BBC-ge silteme jasap.
Germaniiadaǵy Alfred Vegener atyndaǵy poliarlyq jáne teńiz zertteýleri institýtynyń jáne Shveitsariianyń qar men kóshkindi zertteý institýtynyń komandasy ótkizgen zertteýler nátijesi Science Advances ǵylymi jýrnalynda jariialandy.
Nemis institýtynyń zerthanasynda shyny qutylarǵa jinalǵan úlgilerdi zerttei kele, ǵalymdar qardyń árbir litrinen plastiktiń oń myńǵa jýyq mikroskopiialyq bólshegin anyqtaǵan.
Bul – adam Arktikaǵa kelse de aýamen birge osy bólshekterdi jutady degendi bildiredi. Mikroplastiktiń adamnyń aǵzasyna áseri ázirge tolyq zerttelmegen.
Sondai-aq, zertteýshiler qardan rezeńke jáne qatty talshyqtardyń (sintetikalyq bolýy múmkin) bólshekterin tapty.
Jalpy ǵalymdar qar sýynan kóp mikrobólshekterdi anyqtady. Plastmassadan bólek onda tselliýloza, qylshyqtyń bólshekteri tabyldy, sondai-aq, rezeńkeli shinalardyń, laktar men boiaýlardyń bólshekteri bolǵan.
«Biz qandai da bir lastanýdy anyqtaimyz degen oida boldyq, alaida mikroplastiktiń osynshama mólsheri bizdi tań qaldyrdy», , - dedi ekpeditsiia jetekshisi, professor Melani Bergmann.
«Qardaǵy mikroplastikterdiń basym kópshiligi aýadan túsken bolýy kerek», - dedi ol.
