Foto: ál-Farabi atyndaǵy QazUÝ-dyń Baspasóz qyzmeti
Ál-Farabi atyndaǵy Qazaq ulttyq ýniversitetinde II halyqaralyq «Mura institýttary qoǵamdy ornyqty damytý jolynda» arhivshiler kongresi aiasynda «Arhivshilerdiń kásibi bilimi men damýy» taqyrybyndaǵy dispýt-sessiiasy ótti.
Aýqymdy sharaǵa Ál-Farabi atyndaǵy QazUÝ-dyń Basqarma Tóraǵasy – Rektor Janseiit Túimebaev, Iordaniia Ulttyq kitaphanasynyń bas direktory Nidal Ibrahim, Ulybritaniia Ulttyq arhivi Bilim jáne aǵartý basqarmasynyń basshysy Endriý Pein, Litva Respýblikasyndaǵy Kaýnas oblystyq memlekettik arhiviniń direktory Gintaras Drýchkýs, úzdik sarapshylar, IýNESKO ókilderi, Eýropa odaǵynyń mamandary men TMD elderiniń jetekshi ǵalymdary qatysty.
Biyl Qazaqstan Respýblikasy Prezidenti Arhiviniń qurylǵanyna – 30 jyl. Jiynda qatysýshylar arhiv isin birlesip damytý jóninde pikir almasyp, tájiribelerimen jáne ideialarymen bólisti. Negizgi maqsat – tarihi-mádeni, qujattyq murany saqtaýdyń ózekti máseleleri boiynsha kásibi qoǵamdastyqpen syndarly dialog qurý. Bul muraǵattardy damytýdyń innovatsiialyq ideialaryn qalyptastyrýǵa jáne úzdik arhivtik tájiribeni taratýǵa yqpal etedi.
Is-sharany Ál-Farabi atyndaǵy QazUÝ rektory Janseiit Túimebaev ashyp, oqý ordasynda arhiv isi boiynsha júrgizilip jatqan jumystarǵa toqtaldy. Sondai-aq óz sózinde rektor bilim ordasynda jyl saiyn atalǵan salaǵa qajetti mamandar daiarlanyp jatqanyn aitty.
«Memleket basshysy Qasym-Jomart Toqaev el tarihyna airyqsha mán berip, «Tarihymyzǵa shynaiy kózben qarap, ony sol qalpynda qabyldaýymyz kerek. San ǵasyrlyq tarihymyzdy zertteý, tarihi ádildikti qalpyna keltirý – bizdiń negizgi mindetimiz», – dep atap ótken bolatyn. Búginde Ál-Farabi atyndaǵy Qazaq ulttyq ýniversiteti men QR Prezidenti arhivi tyǵyz qarym-qatynasta birlesip jumys atqaryp keledi. QazUÝ – 90 jyldyq tarihynda arhivshilerdiń birneshe býynyn daiarlaǵan biregei oqý orny. Tarihi, mádeni murany saqtaý, zertteý, damytý jáne ult igiligine paidalaný – bizdiń ortaq maqsatymyz. Osy oraida, búgingi qatysyp jatqan barlyq ǵalym-sarapshylardy bolashaqta arhivtaný salasy boiynsha QazUÝ-da dáris ótkizýge shaqyramyn. Bul bastama aldaǵy ýaqytta Qazaqstanǵa jáne ózge de memleketterge qatysty muraǵattardy birlesip paidalanýǵa jáne zertteýge mol múmkindik beredi», – dedi rektor.
Iordaniia Ulttyq kitaphanasynyń bas direktory Nidal Ibrahim: «Men Ál-Farabi atyndaǵy Qazaq ulttyq ýniversitetinde ekinshi márte sizdermen kezdeskenime qýanyshtymyn. Ýniversitet rektory Janseiit Túimebaev aitqandai, biz bir-birimizge árdaiym kómektesýimiz qajet. Osy turǵyda oqytýshylar men stýdentterdi almasý jumysyn jandandyrý mańyzdy. Men aldaǵy ýaqytta arhiv isi boiynsha Qazaqstannyń kitaphanalarymen jáne JOO-larymen kelisimge qol qoiyp, seriktestik ornatamyz degen oidamyn», – dedi.
Sonymen qatar halyqaralyq jiynda Polsha, Resei, Ózbekstan, Litva jáne t.b. memleketten kelgen ǵalym-sarapshylar sóz sóilep, arhiv isi salasyn damytý baǵytynda túrli oi-pikirlerin ortaǵa saldy.
Plenarlyq otyrys túrli taqyryptarǵa arnalǵan sektsiialarda jalǵasty. Aita keteiik, II halyqaralyq arhivshiler kongresin QazUÝ Qazaqstan Respýblikasy Prezidentiniń Arhivimen, Halyqaralyq arhivter keńesimen (ICA), IýNESKO-nyń Almaty qalasyndaǵy óńirlik keńsesimen, QR Syrtqy ister ministrligimen, QR Mádeniet jáne aqparat ministrligi jáne Almaty qalasynyń ákimdigimen birlesip ótkizdi.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne dizainerlik óner
kafedrasynyń oqytýshysy
