Ál-Farabi atyndaǵy Qazaq ulttyq ýniversitetiniń ǵalymdary arheolog ári professor Ábdesh Tóleýbaevtyń jetekshiligimen Shyǵys Qazaqstan oblysy Tarbaǵatai aýdanyndaǵy Eleke sazynan saq qoǵamynyń bileýshisine tiesili at-ábzelderin tapty, dep habarlaidy "Ult aqparat".
Zertteý jumystarynyń nátijesinde tabylǵan 850 altyn buiymnyń barlyǵy saltanatty at sherýine arnalǵan. Ǵalymdardyń baǵamdaýynsha, qazyna orta saq dáýirine tiesili. Shamamen bizdiń zamanymyzǵa deiingi V-IV ǵasyrlardyń enshisindegi jádigerler.
«Qazynany qorǵannyń ózinen tapqan joqpyz. Bul kósemniń ziraty qulshylyq orny ekeninen habar beredi. Kósem qaitys bolǵan soń osy aýmaq kieli oryn dep sanalyp, oǵan kelgen halyq ata-baba rýhyna syiynǵan. Saqtar men keiingi túrik taipalarynda osyndai dástúr bolǵan. Soǵan bailanysty biz munda el bilegen kósem jerlendi degen tujyrym jasadyq», - dedi Ábdesh Tóleýbaev.
Tabylǵan artefaktilerden saq qoǵamy bai men kedei dep topqa bólingenin ańǵarýǵa bolady. Ǵalymdardyń pikirinshe, úlken qulaqty jolbarys-pantera úlgisinde jasalǵan alqa erekshe qyzyǵýshylyq týdyrady. Mifologiialyq janýardyń aiaǵyna ilingen qońyraý da bar. Sondai-aq ǵalymdardy eki shynjyr symdaǵy aqyq tastary bar alqa qyzyqtyrdy.
«Ejelgi sheberler birin-biri qaitalamaǵany kórinip tur. Árbir sheberdiń ózindik qoltańbasy baiqalady. Barlyq tabylǵan zat muqiiat jasalǵan. At-ábzelderiniń deni juqa folgadan ázirlengen. Altynnan tyǵyzdalyp jasalǵan at-ábzelderin buǵan deiin kezdestirgen joqpyn», - dedi Ábdesh Tóleýbaev.
Taǵy bir erekshe dúnieniń biri – mysyq tuqymdastarǵa jatatyn mifologiialyq qulaqty jyrtqysh ań beinelengen alqa. Aita keteiik, Tarbaǵatai jerin mekendegen saqtardyń bul qolónerleri bizdiń dáýirimizge deiingi V- IV ǵasyrlarǵa tiesili. Tabylǵan jádigerlerdiń ereksheligi – sapasy men bir-birine uqsamaityndyǵynda jatyr.
Sondai-aq arheolog qorǵannan 50 metr jerde qola men altyn quiatyn ustahana tabylǵanyn atap ótti. Ábdesh Tóleýbaevtyń aitýynsha, tabylǵan jádigerler – bul zertteý jumystarynyń bastapqy nátijesi ǵana. Óitkeni arheologtardyń aldaǵy ýaqytta atqaratyn jumystary jeterlik. Taiaý arada olar 4 kishi qorǵandy zertteýge kirisedi.
