Memleket basshysy Qasym-Jomart Toqaev «QAZAQSTAN» telearnasyna bergen suhbatynda qańtarda mitingke shyqqandar týraly pikir bildirdi. Prezident arandatýshylar men qaraqshylardyń shynaiy maqsaty bilikke shabýyl jasaý bolǵanyn aitty, dep habarlaidy "Ult aqparat".
"Árine, bastapqyda beibit sherýler boldy. Muny bárimiz kórdik. Elimizdiń ár aimaǵynda azamattar alańǵa jinalyp, óz talaptaryn aitty, tipti, narazylyqtaryn bildirdi. Shynyn aitsaq, áýelde eshqandai qiratý, qylmystyq áreketter bolǵan joq. Biraq jaǵdai keiin múldem basqa arnaǵa burylyp ketti. Arandatýshylar men qaraqshylar paida boldy. Olardyń shynaiy maqsaty beibit mitingige qatysý emes, bilikke shabýyl jasaý boldy. Bir sózben aitqanda, sońyna qarai alańǵa naǵyz lańkester shyqty. Búlikshiler myńdaǵan qarý-jaraqty urlap ketti. Qazir politsiia olardy izdep jatyr. Ázirge túgeldei tabylǵan joq. Buzaqylar sol qarýdan taǵy da adam atýy ábden múmkin. Sonda muny kim istedi degen suraq týady? Kim jasady? Beibit sherýge shyqqandar ma? Shyn máninde, bul - kásibi qaraqshylardyń isi", - dedi Toqaev.
