Aqmola oblysynyń Atbasar qalasynda kóppáterli turǵyn úiden shyqqan órt saldarynan 1 adam qaza taýyp, 3 adam qutqaryldy. Bul týraly Tótenshe jaǵdailar ministrliginiń resmi ókili Talǵat Ýáli málim etti, dep habarlaidy "Ult aqparat".
«Keshe túnde Atbasar qalasynda bes qabatty turǵyn úidiń páterleriniń birinen órt shyqty. Órt sóndirý barysynda úsh adam qutqaryldy. Taǵy 6 adam qaýipsiz jerge shyǵaryldy. Onyń ishinde 3 bala bar. Ókinishke orai, órt bolǵan páterde 1966 jyly týǵan er adamnyń múrdesi tabyldy», - dedi ol.
Resmi ókildiń atap ótýinshe, órttiń shyǵý sebebi anyqtalyp jatyr.
Órtti sóndirýge Tótenshe jaǵdailar departamentiniń 7 mamany men 2 tehnikasy jumyldyryldy. Oqiǵa ornynda aýdandyq politsiia bóliminiń kezekshi jedel-tergeý toby jumys istedi.
«26 minýt ishinde órt tolyǵymen sóndirildi. Órt úshinshi qabattaǵy páterlerdiń birinen shyqqan. Úi zattary men jihazdar órtengen. Órt kezinde tómengi qabatta turatyn turǵyndar úilerinen ózdigimen shyǵyp ketken. Joǵary qabattardaǵy turǵyndar qalyń tútinniń saldarynan tómen túse almady. Órt sóndirýshiler ár páterdi tekserip, onda adamdar bolǵan kezde ottegi maskasyn kiip, taza aýaǵa shyǵardy», - dedi Talǵat Ýáli.
