Memleket basshysy Halyqaralyq Araldy qutqarý qorynyń quryltaishy memleketteriniń basshylary otyrysynyń qorytyndysy boiynsha birlesken baspasóz máslihatyn ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti jýrnalister men resmi delegatsiialar músheleriniń aldynda sóilegen sózinde Túrikmenstan Prezidentine dástúrli qonaqjailyq kórsetkeni úshin rizashylyq bildirip, sammittiń joǵary deńgeide uiymdastyrylǵanyn atap ótti.
– Bul kezdesýimizdiń álemniń barsha musylman qaýymy úshin qasietti Qurban ait merekesinen keiin ótkizilýiniń simvoldyq máni zor. Osy múmkindikti paidalana otyryp, baýyrlas halyqtarǵa baq-bereke, beibit ómir, amandyq tileimin, – dedi Nursultan Nazarbaev.
Memleket basshysy Aral daǵdarysy adamzat tarihyndaǵy eń iri ekologiialyq apattardyń biri bolyp sanalatynyn atap ótip, 50 jyl ishinde teńizdiń aýmaǵy 9 ese kemip, sý kólemi 30 ese azaiǵanyn aitty.
– Jyl saiyn Aral teńiziniń keýip qalǵan ultanynan jelmen birge 80 million tonna ýly tuz kóteriledi. Bul tuz shańdy daýylmen Batys Eýropadan Gimalaidyń shyńdaryna deiin myńdaǵan shaqyrymǵa taralyp, adamdardyń densaýlyǵyna jáne elderimizdiń ekologiialyq júiesine zardabyn tigizýde, – dedi Memleket basshysy.
Nursultan Nazarbaev Aral aimaǵynyń ekologiialyq jaǵdaiyn jaqsartýǵa baǵyttalǵan Halyqaralyq Araldy qorǵaý qorynyń quryltaishy memleketteriniń kúsh-jigerin qoldaý úshin taraptardyń osy problemamen ainalysatyn dúniejúzilik qoǵamdastyqqa, Birikken Ulttar Uiymyna, barlyq Qorlar men bankterge júgingeni jón dep tapqanyn atap ótti.
– Biz óz tarapymyzdan Qordyń jumysyn jetildirýge ýaǵdalastyq. Barlyq máselelerdi, sonyń ishinde eskirgen sheshimderdi, sondai-aq Qordyń barlyq basqarýshy jáne atqarýshy organdarynyń qyzmetin taldaý máselesin shaǵyn quramda ashyq talqyladyq, – dedi Qazaqstan Prezidenti.
Memleket basshysy sý shyǵynyn 50-60 paiyzǵa qysqartyp, ónimdilikti 4-5 ese arttyratyn tamshylatyp sýarý siiaqty zamanaýi tehnologiianyń jáne sýarýǵa qoldanylatyn sýdy únemdi paidalanýdyń mańyzdylyǵyn atap ótti.
– Zamanaýi ǵylymi ustanymdarǵa negizdelgen óte mańyzdy usynystar boldy. Mysaly, ekologiialyq jaǵdaidy jaqsartýǵa septigin tigizetin ári aýyl sharýashylyǵynda malǵa jem daiyndaýdyń kózi bola alatyn, sondai-aq tuzdyń kóterilýin boldyrmaityn, tuzǵa tózimdi jasyl kóshetter otyrǵyzý máselesi aityldy, – dedi Nursultan Nazarbaev.
Qazaqstan Prezidenti usynystardyń bári sammittiń kommiýnikesinde bekitilgenine toqtalyp, túrikmen tarapy barlyq usynystardy jinaqtaitynyn, al atqarýshy komitet aldaǵy is-qimyldardyń naqty josparyn ázirleitinin atap ótti.
Jiyn sońynda Memleket basshysy taraptardyń sý sharýashylyǵy, óńirdiń sý-energetikalyq jáne ekologiialyq aspektileri jónindegi ustanymdaryn jaqyndastyrý máselelerin egjei-tegjeili talqylaǵanyn atap ótip, Qazaqstan ótken kelissózderdiń nátijelerin joǵary baǵalaitynyn aitty.
