Kezinde biregei sý qoimasy bolǵan Aral qazirgi tańda óńirdegi elder úshin orasan zor ekologiialyq problemaǵa ainalyp otyr. Bul týraly Qazaqstan Parlamenti Senatynyń Tóraǵasy Máýlen Áshimbaev aitty, dep habarlaidy QazAqparat.
Qyzylorda oblysynyń Aral aýdanynda Qazaqstan Respýblikasynyń Parlamenti Senaty men Ózbekstan Respýblikasynyń Olii Majlisi Senaty arasyndaǵy yntymaqtastyq jónindegi komissiianyń ekinshi otyrysy ótti. Jiynda Araldy qalpyna keltirý jáne onyń ekojúiesin qorǵaý máselelerinde Qazaqstan men Ózbekstannyń yntymaqtastyǵyn odan ári nyǵaitý máselesi sóz boldy.
«Bizdiń elderimizdiń memleket basshylary Aral problemasyn sheshý jáne transshekaralyq sý resýrstaryn tiimdi paidalaný mańyzdy ári kezek kúttirmeitin másele ekenine únemi basa mán berip keledi. Bir kezderi biregei sý qoimasy bolǵan Aral qazir óńirdegi elder úshin orasan zor ekologiialyq problemaǵa ainalyp otyr. Bul yntymaqtastyqty nyǵaitý jáne Araldy qaita jandandyrý úshin ozyq tájiribe men tehnologiialardy keńinen qoldanýǵa múmkindik beretini sózsiz», – dedi Máýlen Áshimbaev.
Senat Tóraǵasy Dúniejúzilik bank pen Qazaqstan Úkimeti qarjylandyrǵan «Syrdariia ózeniniń arnasyn retteý jáne Aral teńiziniń soltústik bóligin saqtaý» jobasynyń qolǵa alynýy men onyń birinshi kezeńiniń iske asyrylýy mańyzdy qadam ekenin aitty. Sondai-aq Palata Spikeri qazirgi tańda teńiz deńgeiin ustap turý úshin jańa mindetterdiń aýqymdy keshenin qamtityn osy jobanyń ekinshi kezeńin júzege asyrý qajettigine nazar aýdardy.
Máýlen Áshimbaev Aral aimaǵyn qalpyna keltirý boiynsha birlesken jumysty qoldai otyryp, Halyqaralyq Araldy qutqarý qorynyń platformasyn barynsha paidalaný mańyzdy ekenin jetkizdi. Budan basqa, óńirdiń ekojúiesin qalyptastyratyn transshekaralyq ózenderdiń sý resýrstaryn birlesip basqarýdyń ózara tiimdi jáne ońtaily tártibin izdestirý kerektigin de tilge tiek etti.
«Birinshi kezekte, Aral máselesi boiynsha qazirgi problemalardy sheshýge bailanysty memlekettik organdarmen tyǵyz bailanys ornatýdyń mańyzy zor. Qazir bul baǵytta jumys júrgizilip jatyr. Odan bólek, belgilengen josparlardyń iske asyrylý barysyna parlamenttik baqylaý júrgizýdi tiimdi paidalanǵan jón. Depýtattyq korpýs Aral máselesi boiynsha jáne óńirdi damytý jónindegi bastamalarǵa qajetti zańnamalyq qoldaý kórsete alady. Birlesip, bul máselelerdi halyqaralyq alańdarda da belsendi túrde ilgeriletýdiń de bereri mol dep esepteimiz. Jalpy bizde tiimdi birlesken jumys úshin qajetti múmkindikter men resýrstar bar», – dedi Máýlen Áshimbaev.
