Qyzylorda oblysy, Aral aýdanynyń úsh aýylynda biylǵy jyldyń maýsym aiynyń sońǵy on kúndiginde túieler tabanynyń túsýine ushyratqan aýrý kezdesti, dep habarlaidy "Ult aqparat".
Qazirgi tańda jergilikti veterinariia salasynyń mamandary aýrý belgilerin anyqtap, oǵan qatysty bilik tarapynan jedel sharalar qabyldandy.
Aýdanǵa qarasty Aqqum, Qaraqum aýyldyq okrýgteri jáne Jaqsyqylysh kentinde 24 túieniń atalǵan aýrýmen syrqattaǵan jaǵdaiy tirkeldi. Veterinar mamandar túielerge klinikalyq tekserý júrgizip, «Nekrobakterioz» boljamdy diagnozyn qoiyp otyr. Ol asa qaýipti aýrý túrlerine jatpaidy.
«Atalǵan aýrýǵa janýarlardyń barlyq túri ushyraýy múmkin. Ol qajetti jem-shóp qoreginiń azdyǵynan, qýańshylyqtyń bolýynan týyndaidy. Máselen, ol qystan aryq, kóterem bolyp shyqqan, immýniteti tómen maldarda jii kezdesedi. Ol aýyrǵan túielerdiń tabanyn zaqymdap, mazoldi qabatyn buzyp túsiredi. Sondai-aq, laily-shalshyq jerlerde, kóktemde qora-jailarǵa mehanikalyq antisanitarlyq jumystardyń júrgizilmeýinen de paida bolady.
Veterinar dárigerler aýyrǵan túielerdi emdeý úshin túrli antibiotikterdi qoldanýda», - dedi oblystyq veterinariia basqarmasy basshysynyń orynbasary Ánýarbek Darmaǵanbetov.
Onyń aitýynsha, bul maqsatta «Bitsillin-3», «ASD fraktsiia-3» eritindisi, «Ashoksi», «Nitoks-200» veterinariialyq preparattaryn maldarǵa egý júrgizilýde. Preparattar mal iesiniń óz qarajaty esebinen egilýde. Oǵan shamaman 8-10 myń teńgege deiin qarajat jumsalady.
Qazirgi kúni aýyrǵan túie maldarynyń jaǵdaiy qalypty deńgeide. Aýyrǵan 24 bas túieniń búginde 14-i saýyqqan. Al, qalǵan 10 bas túiege emdik sharalary júrgizilýde.
Búgingi kúni veterinar mamandar mal ielerine emdeý protsesin tegin júrgizip jatyr. Mal aýrýlary turaqty baqylaýǵa alynǵan.
Aita keteiik, aýrý belgileri anyqtalǵan túielerden qosymsha synama alynýda. Synamalar respýblikalyq veterinarlyq zerthananyń Qyzylorda oblysyndaǵy filialyna tapsyrylady.
