Uiymdasqan toptar zorlyq-zombylyq jasaý kezeńine elimizdiń ár aimaqtarynda bir mezgilde kóshken. Bul týraly QR Bas prokýratýrasy Arnaiy prokýrorlar qyzmetiniń bastyǵy Rizabek Ojarov aitty, dep habarlaidy QazAqparat.
«Qazir tergeý oryn alǵan oqiǵalardyń qalai bolǵanyn anyqtaýda. Bastapqy kezeńde narazylyq bildirýshiler ózderin beibit ustady. Ol jerlerde qarapaiym qyzyǵýshylyq tanytqandar, ótip bara jatyp toqtaǵandar da kóp bolǵan. Aiaǵy tártipsizdikke ainalady dep eshkim oilamaǵan. Alaida, keiinnen olardyń arasyna qylmystyq elementter men buzaqylar qosylyp, bastamany óz qoldaryna alyp, belsendi áreketterge itermelei bastady.
Sonymen qatar WhatsApp jáne Telegram arqyly, ásirese 4-5 qańtar kúnderi tártipsizdikterge qatysýshylardyń jinalý oryndaryn, qozǵalý baǵyttaryn úilestirgen qazaqstandyq chattar aiqyndaldy. Mysaly, Almaty qalasynda sanaýly saǵattyń ishinde bir messendjerge qatysýshylar sany 140-tan 5,5 myńǵa deiin artty. Osyǵan uqsas Jambyl oblysynda – chatqa qatysýshylar sany 4 myńǵa deiin jetken. Sóitip qysqa ýaqyt ishinde jinalǵan adamdar basqynshy toptarǵa ainalǵan», - dedi Rizabek Ojarov Ortalyq kommýnikatsiialar qyzmetindegi brifing barysynda.
Onyń atap ótýinshe, uiymdasqan toptar zorlyq-zombylyq jasaý kezeńine elimizdiń ár aimaqtarynda bir mezgilde kóshken. Birazy dúkenderdi talqandap, tonaýmen ainalysqan. Olar tipti turǵyn úilerdiń birinshi qabattarynda ornalasqan úi-jailardy órtep jibermek bolǵan.
«Tek turǵyndardyń janqiiarlyq toitarys berý áreketteri ǵana budan da aýyr zardaptar men kóptegen qurbandardyń aldyn alǵan. Dál osy ýaqytta basqalary lańkestik shabýyldy jalǵastyra bergen. Olar aitarlyqtai kóp adam jinap, armatýra, taiaq, kirpish, tas jáne Molotov kokteilderimen qarýlanǵan. Olarǵa ǵimarattardy órteý úshin avtomobil dóńgelekteri men benzin jetkizilgen. Odan keiin, aitarlyqtai sandyq artyqshylyqty paidalana otyryp, qorshaýlardy buzyp, óńirlerdegi biliktiń nyshany retindegi ákimdikter ǵimarattaryn basyp alýǵa kirisken. Olar qarý-jaraq qoimalaryn basyp alyp, atys qarýyn alý úshin politsiia ǵimarattaryna shabýyl jasap, soqqysh retinde qaýipsizdik kúshterinen tartyp alynǵan arnaiy tehnika men kólikterdi, basqa da quraldardy paidalanǵan. Urlanǵan qarý-jaraqty, azyq-túlik pen aýyz sýdy búlikshilerge jetkizý jáne taratý amaldaryn uiymdastyrǵan. Qarý-jaraqtyń búlikshilerge qalai jetkizilgenin áleýmettik jelilerde keńinen taraǵan videolardan kórýge bolady», - dedi ol.
