QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov ataýly áleýmettik kómek mólsheri qalai esepteletindigin túsindirdi, dep habarlaidy QazAqparat.
«Ár balaǵa 42 500 teńgeden járdemaqy tóleý máselesin jan-jaqty qarastyrdyq, zerdeledik. 42 500 teńgeden, 20 myń teńgeden járdemaqy qarastyrýdy usynǵandar da boldy. Biraq, ortaq ymyraǵa kele otyryp, kópbalaly otbasylardyń ár balasyna 4 AEK mólsherinde, iaǵni 11 668 teńgeden járdemaqy tóleý sheshimi qabyldandy jáne qazirgi ýaqytta berilip jatyr. Elimizde 18 jasqa tolmaǵan 6,2 mln bala bar. Eger 42 500 teńgeni 6,2 mln-ǵa kóbeitsek, ai saiyn 263 mlrd teńge, jylyna 3,2 trln teńge shyǵady. Al Eńbek ministrliginiń halyqqa kórsetetin áleýmettik qoldaý is-sharalaryna jumsaityn qarajaty 3,9 trln teńgeni quraidy. Bul respýblikalyq biýdjettiń 24 paiyzyna teń. Endi oǵan 3,2 trln teńge qosatyn bolsaq, onda bul elimizdiń densaýlyq saqtaý, bilim, qorǵanys, turǵyn úi jáne basqa da mańyzdy salalarǵa jumsalatyn qarajatynyń shektelýine ákep soǵýy múmkin», - dedi ol Ortalyq kommýnikatsiialar qyzmetindegi brifing barysynda BAQ ókilderiniń saýalyna orai.
Departament basshysynyń atap ótýinshe, Eńbek ministrligi joǵaryda atalǵan jaittardy eskere kele, ár balaǵa ai saiyn 42 500 teńgeden járdemaqy tóleý usynysyn qoldaǵan joq.
