QR Premer-Ministriniń orynbasary - QR Qarjy ministri Álihan Smaiylov kópbalaly otbasyndaǵy árbir balaǵa 21 myń teńgeden tóleý júiesin túsindirip berdi, dep habarlaidy "Ult aqparat" QazAqparat agenttigine silteme jasap.
Onyń sózine qaraǵanda, aldymen kópbalaly otbasynyń tabysy esepteledi. Al jańa járdemaqy tabysy tómen otbasylarǵa ǵana tólenedi.
«Bul - áleýmettik jaǵynan az qamtylǵan otbasylarǵa arnalǵan kómek. Jaǵdaiy jaqsy otbasylar ondai kómekke zárý emes dep oilaimyn. Al kedeishilik deńgeiinen tómen otbasylarǵa kómektesý kerek. Prezident aitqandai, kedeishiliktiń deńgeii kúnkóris minimýmynyń 50 protsentinen 70 protsentke deiin kóteriledi. Otbasynyń árbir múshesine shaqqanda osy mejeden tómen turǵandarǵa ataýly kómektiń jańa túri beriledi. Sosyn ondai otbasylardyń jalpy tabysyn eseptegende basqa áleýmettik tólemder eskerilmeidi. Budan bólek, áleýmettik kómekti alý sharalary jeńildeidi. Demek, áleýmettik jaǵynan az qamtylǵan kópbalaly otbasylarda árbir balaǵa 21 myń teńgege jýyq járdemaqy tólenedi. Naqty aitsaq, 20 789 myń teńge. Ondai kómekti tórt jáne odan kóp balasy bar otbasylar alady», - dedi Á.Smaiylov jýrnalisterge bergen suhbatynda.
Onyń aitýynsha, sońǵy eki jyldyń ishinde áleýmettik salaǵa respýblikalyq biýdjetten bólingen qarjynyń kólemi 34 protsentten 45 protsentke deiin artty. Aldaǵy úsh jylda atalǵan kórsetkishti 49 protsentke deiin ulǵaitý josparlanyp otyr.
«Búgin Memleket basshysy qosymsha tapsyrmalar berdi. Sonyń aiasynda áleýmettik jaǵynan az qamtylǵandar, sonyń ishinde kópabalaly otbasylardy qoldaý sharalary kúsheiedi. Prezident ataýly kómekti arttyrýdy júktedi. Baspanamen qamtý bar. Jergilikti jerde infraqurylymdyq nysandardy salý qajet. Sonyń barlyǵyna aldaǵy eki-úsh jylda qosymsha 2 trillion teńge bólinedi. Shamamen 1 trillion teńge Ulttyq qordan quiylady», - dep atap kórsetti Á.Smaiylov.
Sondai-aq, Smaiylov tabysy tómen kópbalaly jáne tolyq emes otbasylar men múgedek balalardy asyrap otyrǵan azamattarǵa baspana alýǵa beriletin 2-3 paiyzdyq nesieler júiesi týraly pikir bildirdi.
Onyń aitýynsha, aldymen respýblikalyq biýdjetten Turǵyn úi qurylys jinaq bankine 50 milliard teńge bólinedi. Bank ol qarajatty basqa resýrstarmen birge jeńildetilgen nesielerdi berýge jumsaidy.
«Sáýir aiynda biz qarjylandyrýdy bastaimyz. Odan keiin Turǵyn úi qurylys jinaq banki nesieniń jańa túrin tezdetip ázirlep, halyqqa usynýy qajet. Biraq biyldan bastap 2-3 protsenttik nesieler beriledi. Ol - anyq nárse», - dedi Á.Smaiylov jýrnalisterge bergen suhbatynda.
Aita keteiik, búgin Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy, sonymen qatar tabysy tómen otbasylarǵa 2-3 protsentpen baspana satyl alý múmkindigin qarastyrýdy tapsyrdy.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deiin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar bai azamattar bolyp shyǵa keledi.
Odan bólek, tabysy tómen kópbalaly jáne tolyq emes otbasylarǵa, múgedek balalary bar, az qamtylǵan otbasylarǵa páter satyp alýdyń qoljetimdiligin arttyrý qajet. Bul sanattaǵy azamattarǵa Turǵyn úi qurylys jinaq júiesi arqyly jyldyq 2-3 paiyzben turǵyn úi zaemyn berý tetikterin ázirleýdi tapsyramyn. Ol úshin Turǵyn úi qurylys jinaq bankine qarajat qajet bolady jáne oǵan jyl saiyn 50 mlrd teńge bólýdi tapsyramyn»,- dedi N.Nazarbaev», - dep atap kórsetti N.Nazarbaev.
