Ár balaǵa 11 myń teńge kóleminde járdemaqy tóleý týraly habarlama jalǵan. Eńbek jáne halyqty áleýmettik qorǵaý ministrligi osyndai málimdeme jasady, dep habarlaidy "Ult aqparat".
Aita keteiik, habar taratýshy ártúrli messenjerlerde «1 qazannan bastap otbasy jaǵdaiyna qaramastan ár balaǵa 11 myń teńgeden járdemaqy tólenedi» degen aqparat taraǵan bolatyn. Ministrliktiń málimetinshe, bul shyndyqqa janaspaidy.
«Balaly otbasylardyń quqyǵyn jáne zańdy múddelerin qorǵaý - Qazaqstan Respýblikasy memlekettik saiasatynyń negizgi baǵyttarynyń biri. Búgingi tańda bala týýdy yntalandyrýǵa jáne balalardy otbasynda tárbieleýge járdemdesýge baǵyttalǵan memlekettik járdemaqylar men tólemder júiesi usynǵan balaly otbasylardy qoldaýdyń ulttyq modeli quryldy» deidi vedomstvodan.
Ol model mynadai:
- bala týýyna bailanysty járdemaqy (birinshi, ekinshi, úshinshi balaǵa beriletin járdemaqy mólsheri 95 950 teńge (38 AEK), tórtinshi jáne odan da kóp bala úshin - 159 075 teńge (63 AEK);
- bir jasqa deiingi balanyń kútimine arnalǵan járdemaqy (biylǵy járdemaqy mólsheri birinshi balaǵa 5,76 AEK - 14 544 teńge, ekinshi balaǵa 6,81 AEK - 17 195 teńge, úshinshi balaǵa 7,85 AEK - 19 821 teńge, tórtinshi jáne odan kóp bala úshin 8,90 AEK - 22 473 teńge);
- múgedek balany eresek bolǵanǵa deiin tárbielep otyrǵan anasyna nemese ákesine, asyrap alýshysyna, qamqorshysyna taǵaiyndalǵan jáne tólengen járdemaqy (onyń mólsheri 2019 jyldyń 1 shildesinen bastap ortasha eseppen 41 418 teńge (1,4 eń tómengi kúnkóris deńgeii)
- bala kezinen birinshi toptaǵy múgedektigi bar azamatty kútýge tólenetin járdemaqy (2019 jyldyń 1 shildesinen bastap, 41 578 teńge (13.4 eń tómengi kúnkóris deńgeii)
Sondai-aq, Qazaqstanda «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyna ie bolǵan, I jáne II dárejeli «Ana dańqy» ordenderimen marapattalǵan kópbalaly analarǵa ai saiynǵy memlekettik járdemaqy tabysyna qaramastan tólenedi (kólemi -16 160 teńge).
Sonymen qatar, 4 jáne odan da kóp kámeletke tolmaǵan balalary bar kópbalaly otbasylarǵa 2018 jylǵy 1 qańtarǵa deiin taǵaiyndalǵan járdemaqy tólenedi, 2019 jyly járdemaqy mólsheri – 10 504 teńge.
Sonymen qatar, jumys isteitin áielderge bosanýy jáne bir jasqa deiingi bala kútimi boiynsha járdemaqy Memlekettik áleýmettik saqtandyrý qorynan tólenedi.
Esterińizge sala keteiik, QR Prezidenti Qasym-Jomart Toqaevtyń Qazaqstan halqyna Joldaýynda aitylǵan tapsyrmasyna sáikes QR Eńbek jáne halyqty áleýmettik qorǵaý ministrligi ataýly áleýmettik kómek kórsetýdiń jańa mehanizmderin ázirleýde. Bul mehanizmder ashyqtyq, ádildik jáne eńbekke yntalandyrý qaǵidattaryna negizdelip, balalardy áleýmettik qoldaý sharalaryna erekshe nazar aýdarylatyn bolady.
