Aqtóbede adamdardy qorqytyp, aqsha bopsalaýmen ainalysqan jeti adam ustaldy. Tergeý málimetinshe, olar jábirlenýshini kúshpen nesie rásimdeýge jáne depozittegi qarajatyn sheship berýge májbúrlep, 700 myń teńgeni iemdengen, dep habarlaidy ult.kz.
Aqtóbe oblystyq politsiia departamentiniń Uiymdasqan qylmysqa qarsy kúres basqarmasy men arnaiy maqsattaǵy bólimsheniń qyzmetkerleri qala turǵyndaryn qorqytyp, aqsha bopsalaýmen ainalysqan qylmystyq toptyń áreketin áshkereledi.
Tergeý nusqasyna sáikes, kúdiktiler jábirlenýshini «qaryzsyń» dep negizsiz aiyptap, kúsh qoldaný jáne psihologiialyq qysym kórsetý arqyly aqsha talap etken. Buǵan qosa, ony bank arqyly nesie rásimdeýge jáne depozitindegi qarajatyn sheship berýge májbúrlegen.
Nátijesinde kúdiktiler jábirlenýshiden zańsyz jolmen 700 myń teńgeni iemdengen.
– Jedel-izdestirý is-sharalarynyń nátijesinde jeti kúdiktiniń jeke basy anyqtalyp, olar ustaldy. Barlyǵy ishki ister organdaryna jetkizildi. Atalǵan fakti boiynsha sotqa deiingi tergeý júrgizilip jatyr, – dep habarlady Aqtóbe oblystyq politsiia departamentiniń baspasóz qyzmeti.
Qazirgi ýaqytta politseiler kúdiktilerdiń osyǵan uqsas basqa da qylmystarǵa qatysy bar-joǵyn tekserip jatyr. Sondai-aq olardyń áreketinen zardap shekken ózge azamattardyń bar-joǵy anyqtalýda.
Aita keteiik, Ishki ister ministrliginiń málimetine sáikes, biyl maýsym aiynda elimizde tirkelgen bopsalaý faktileri ótken jyldyń sáikes kezeńimen salystyrǵanda 15 paiyzǵa azaiǵan.
