Aqtóbe oblysynyń Shalqar qalasynda 17 jastaǵy oqýshynyń ólimine qatysty qylmystyq is boiynsha sot protsesi bastaldy. Oqýshyny óltirdi dep 18 jastaǵy birinshi kýrs stýdenti aiyptalyp otyr, dep habarlaidy ult.kz.
KTK arnasynyń málimetinshe, qaiǵyly oqiǵa 19 naýryzda bolǵan. Tergeý nusqasyna sáikes, sol kúni eki top jasóspirim arasynda janjal shyǵyp, arty jappai tóbeleske ulasqan. Tóbeles kezinde 17 jastaǵy Álihan Jánibekovtiń júrek tusyna pyshaq tiip, ol kóz jumǵan.
Prokýrordyń kómekshisi Gúlzira Kósherbaevanyń aitýynsha, sottalýshy janjal kezinde pyshaq qoldanýdy aldyn ala oilastyrǵan. Aiyptaý tarapynyń nusqasy boiynsha, ol Oraldan Shalqarǵa osy maqsatpen kelgen.
Is materialdaryna sáikes, oqiǵa bolǵan kúni keshki saǵat 22:00 shamasynda sottalýshy júrgizýshi kýáligi bolmasa da, anasynyń kóligin ruqsatsyz alyp, dostarymen qalanyń ekinshi bóligine barǵan. Onyń janynda ańshylyq pyshaǵy bolǵan.
Alaida sottalýshy óz kinásin moiyndamaidy. Ol tek kólikti anasynyń ruqsatynsyz júrgizgenin moiyndap, pyshaqty ózine shabýyl jasalǵandyqtan qorǵaný úshin qoldanǵanyn aitty.
«15 shaqty jigittiń maǵan qarai júgirip kele jatqanyn kórdim. Álihan qolymnan ustap aldy, qalǵandary jabyldy. Ólip ketýim nemese múgedek bolyp qalýym múmkin dep qoryqtym. Sondyqtan pyshaqpen urdym», – dedi ol sotta.
Marqumnyń týystary bul nusqamen kelispeidi. Olardyń aitýynsha, sottalýshy jáne onyń dostary Álihan turǵan aýdanǵa ádeii kelgen. Jasóspirimder mektep oqýshylaryn taýyp, olardy kezdesýge shaqyrǵan.
«Olar Álihan turatyn aýdanǵa ádeii kelgen. Oqýshylardy taýyp alyp, telefonǵa túsirgen. Keiin beineni jiberip, úlkenderi kezdesýge kelmese, olardy jazalaityndaryn aitqan. Álihan sol jerge osylai barǵan», – dedi marqumnyń týysy Aǵila Álimanova.
Sotta buǵan deiin de sottalýshynyń zańmen máselesi bolǵany aityldy. Bir jyl buryn ol Shalqar turǵynyn uryp-soqqany úshin jaýapqa tartylǵan. Alaida sottalýshy bul oqiǵanyń mán-jaiyn esine túsire almaitynyn málimdedi.
Sottalýshy marqumnyń týystarynan kópshilik aldynda keshirim surap, Álihandy óltirý nieti bolmaǵanyn aitty. Al is materialdaryna sáikes, pyshaq jaraqatyn salǵannan keiin ol oqiǵa ornynan ketip, TJO ǵimaratyna jasyrynǵan.
Sot endi sol túni bolǵan oqiǵanyń naqty mán-jaiyn anyqtaidy. Marqumnyń týystary sottalýshyǵa eń aýyr jaza taǵaiyndaýdy talap etip otyr.
