Aqtóbede áleýmettik jeńildikterdi rásimdeýge kómektesemin dep azamattardy aldaǵan degen kúdikpen er adam ustaldy, dep habarlaidy ult.kz.
Aqtóbe oblysy Politsiia departamentiniń baspasóz qyzmetiniń málimetinshe, kúdikti azamattardyń senimine kirip, túrli ýádeler berý arqyly olardyń aqshasyn iemdengen.
Tergeýdiń aldyn ala derekterine sáikes, ol 51 jastaǵy áielge balasynyń múgedektik tobyn III toptan II topqa aýystyryp beremin dep sendirip, 400 myń teńge alǵan.
Taǵy bir jaǵdaida kúdikti kámeletke tolmaǵan múgedektigi bar balany tárbielep otyrǵan 27 jastaǵy turǵynǵa turǵyn úi kezegin jyljytyp, baspaǵa alýǵa kómektesetinin aityp, 1 million teńge iemdengen. Alaida ýádesin oryndamai, aqshany jeke qajetine jumsaǵan.
Atalǵan faktiler boiynsha alaiaqtyq baby boiynsha sotqa deiingi tergeý bastaldy. Sonymen qatar politsiia kúdiktiniń óńirde jasalǵan osyǵan uqsas basqa da qylmystarǵa qatysy bar-joǵyn tekserip jatyr.
Politsiia departamenti azamattarǵa múgedektik tobyn belgileý nemese ózgertý, sondai-aq turǵyn úi kezegine qoiý men ony jyljytýǵa qatysty memlekettik qyzmetterdiń tek zańda belgilengen tártippen kórsetiletinin eske saldy. Quqyq qorǵaý organdary mundai qyzmetterdi aqshaǵa «jedeldetip» beremiz degen adamdarǵa senbeýge shaqyrady.
