Aqtóbede áskeri qyzmetke shaqyrýdy keiinge qaldyrýǵa kómektesemin dep aqsha alǵan kúdiktiniń áreketi áshkerelendi, dep habarlaidy ult.kz.
Polisia.kz málimetinshe, politsiiaǵa áskeri qyzmetke shaqyrýǵa bailanysty meditsinalyq komissiiadan ótip júrgen 20 jastaǵy turǵyn júgingen. Onyń aitýynsha, belgisiz azamat 250 myń teńge kólemindegi syiaqy úshin áskerden keiinge qaldyrý rásimin uiymdastyryp berýge ýáde etken.
Jas jigit kúdiktiniń sózine senip, talap etilgen qarajatty qolma-qol tapsyrǵan. Alaida aqshany alǵannan keiin kúdikti bailanysqa shyqpai, ýádesin oryndamaǵan.
Jedel-izdestirý sharalary barysynda tártip saqshylary kúdiktiniń jeke basyn anyqtap, ony politsiia bólimine jetkizdi. Ol 21 jastaǵy jergilikti turǵyn bolyp shyqqan. Tergeý kezinde alǵan aqshany jeke qajettilikterine jumsaǵany belgili boldy.
Atalǵan fakti boiynsha alaiaqtyq baby boiynsha sotqa deiingi tergep-tekserý bastaldy. Qazirgi ýaqytta oqiǵanyń barlyq mán-jaiy anyqtalyp jatyr.
Politsiia azamattardy saq bolýǵa shaqyryp, áskeri qyzmetten bosatý nemese keiinge qaldyrý, jumysqa ornalastyrý jáne memlekettik qyzmetterdi rásimdeý máselelerin aqshaǵa sheship beremin degen adamdarǵa senbeýge keńes berdi.
Tártip saqshylarynyń aitýynsha, áskeri qyzmetke qatysty barlyq sheshimder tek qoldanystaǵy zańnamaǵa sáikes ýákiletti memlekettik organdar arqyly qabyldanady. Azamattar alaiaqtyq belgilerine tap bolǵan jaǵdaida dereý politsiianyń «102» arnasyna habarlasýy qajet.
