Aqtóbe oblysynda internet jáne telefon alaiaqtarynan túsken qarajatty kriptovaliýta arqyly zańdastyrǵan qylmystyq toptyń qyzmeti áshkerelendi. Qazirgi ýaqytta toptyń segiz múshesi qamaýǵa alyndy, dep habarlaidy ult.kz.
Qarjy monitoringi agenttiginiń Aqtóbe oblysy boiynsha departamenti internet-alaiaqtyqqa járdemdesý, zańsyz kásipkerlik, dropperlik qyzmetti uiymdastyrý jáne qylmystyq jolmen alynǵan kiristerdi zańdastyrý faktileri boiynsha sotqa deiingi tergeý júrgizip jatyr.
Tergeý málimetinshe, qylmystyq top Aqtóbe aýmaǵynda azamattardan telefon jáne internet-alaiaqtyq arqyly jymqyrylǵan qarajatty qabyldap, ony konvertatsiialaý jáne zańdastyrýdyń turaqty shemasyn uiymdastyrǵan. Top quramynda onnan astam adam bolǵan, al qylmystyq áreketke 150-den astam dropper tartylǵan.
Vedomstvonyń málimetinshe, kúdiktiler bank qosymshalary men kriptoámiiandar ornatylǵan uialy telefondardy paidalanyp, dropperlerdiń esepshottaryn qashyqtan basqarǵan. Sonyń arqasynda qarjylyq operatsiialar olardyń tikelei qatysýynsyz júzege asyrylyp otyrǵan.
Blokcheindi taldaý quraldarynyń kómegimen quqyq qorǵaý organdary aqshany jylystatýdyń tolyq tizbegin anyqtady. Aldymen jábirlenýshilerdiń qarajaty tranzittik banktik shottar arqyly ótkizilip, keiin baqylaýdaǵy dropperlerdiń esepshottaryna aýdarylǵan. Odan ári bul qarajat kriptovaliýta platformalary arqyly USDT tsifrlyq aktivterin satyp alýǵa jumsalǵan.
Zańsyz operatsiialarǵa zańdy sipat berý úshin jalǵan qaryz sharttary men jalǵan kompaniialar paidalanylǵan. Shemanyń sońǵy kezeńinde qylmystyq kirister qolma-qol aqshaǵa ainaldyrylyp, keiin shetel valiýtasyna aiyrbastalǵan.
Qazirgi ýaqytta elimizdiń 16 óńirinen 80 jábirlenýshi anyqtaldy. Aldyn ala esep boiynsha keltirilgen shyǵyn kólemi 120 million teńgeden asady.
Qylmystyq toptyń 8 múshesi qamaýǵa alyndy, taǵy eki kúdikti úiqamaqqa alyndy. Sot sanktsiiasymen kúdiktilerge tiesili 8 páterge, bir avtokólikke jáne 52 myń USDT kólemindegi tsifrlyq aktivke tyiym salyndy.
Qazir sotqa deiingi tergeý jalǵasyp jatyr. QR Qylmystyq-protsestik kodeksiniń 201-babyna sáikes ózge málimetter jariia etilmeidi.
Eske salaiyq, buǵan deiin Sax Invest qarjy piramidasyn uiymdastyrýshylardyń 7 jylǵa bas bostandyǵynan aiyrylǵany habarlanǵan bolatyn.
