Biylǵy alty aida Qazaqstanda 379 adam astan ýlanyp, olardyń 141-i balalar bolǵan. Bul ótken jyldyń sáikes kezeńimen salystyrǵanda 71 adamǵa kóp. Bul týraly Ortalyq kommýnikatsiialar qyzmetinde ótken brifingte Densaýlyq saqtaý ministrligi Sanitariialyq-epidemiologiialyq baqylaý komitetiniń tóraǵasy Sarhat Beisenova málimdedi, dep habarlaidy ult.kz.
Komitet tóraǵasynyń aitýynsha, tamaqtan ýlaný derekteriniń negizgi sebepteri – qoǵamdyq tamaqtaný oryndarynyń sanitarlyq talaptardy saqtamaýy. Atap aitqanda, ruqsat qujattarynyń bolmaýy, meditsinalyq tekserýden ótpegen qyzmetkerlerdiń jumys isteýi, taǵam ónimderin durys saqtamaý jáne as ázirleý tehnologiiasynyń buzylýy jii kezdesedi.
Osyǵan bailanysty biyl segiz qylmystyq is qozǵaldy. Onyń altaýy boiynsha sotqa deiingi tergeý jalǵasyp jatsa, eki is sotqa joldanǵan. Sonymen qatar, tutynýǵa jaramsyz dep tanylǵan 94 keliden astam taǵam ónimi ainalymnan alyndy.
Jyl basynan beri qoǵamdyq tamaqtaný salasyndaǵy 20 myńnan astam nysannyń 600-i tekserilip, sanitarlyq talaptardy buzǵan kásipkerlerge jalpy somasy 50 mln teńge aiyppul salyndy. Alty nysannyń qyzmeti ýaqytsha toqtatyldy.
Sarhat Beisenova Aqtóbe oblysyndaǵy jappai ýlaný oqiǵasyna qatysty tergeý áli jalǵasyp jatqanyn aitty.
– Aqtóbe oblysynda barlyǵy 188 adam ýlandy, olardyń bir bóligi áli de em qabyldap jatyr. Tekserý barysynda meiramhananyń ruqsat qujattarynsyz jumys istegeni, taǵamdardy saqtaý talaptaryn buzǵany jáne qyzmetkerleriniń meditsinalyq tekserýden ótpegeni anyqtaldy, – dedi komitet tóraǵasy.
Eske salaiyq, buǵan deiin Aqtóbe oblysynda toiǵa qatysqan ondaǵan adamnyń jappai astan ýlanǵany týraly habarlanǵan bolatyn.
