بيىلعى التى ايدا قازاقستاندا 379 ادام استان ۋلانىپ, ولاردىڭ 141-ٸ بالالار بولعان. بۇل ٶتكەن جىلدىڭ سەيكەس كەزەڭٸمەن سالىستىرعاندا 71 ادامعا كٶپ. بۇل تۋرالى ورتالىق كوممۋنيكاتسييالار قىزمەتٸندە ٶتكەن بريفينگتە دەنساۋلىق ساقتاۋ مينيسترلٸگٸ سانيتارييالىق-ەپيدەميولوگييالىق باقىلاۋ كوميتەتٸنٸڭ تٶراعاسى سارحات بەيسەنوۆا مەلٸمدەدٸ, دەپ حابارلايدى ult.kz.
كوميتەت تٶراعاسىنىڭ ايتۋىنشا, تاماقتان ۋلانۋ دەرەكتەرٸنٸڭ نەگٸزگٸ سەبەپتەرٸ – قوعامدىق تاماقتانۋ ورىندارىنىڭ سانيتارلىق تالاپتاردى ساقتاماۋى. اتاپ ايتقاندا, رۇقسات قۇجاتتارىنىڭ بولماۋى, مەديتسينالىق تەكسەرۋدەن ٶتپەگەن قىزمەتكەرلەردٸڭ جۇمىس ٸستەۋٸ, تاعام ٶنٸمدەرٸن دۇرىس ساقتاماۋ جەنە اس ەزٸرلەۋ تەحنولوگيياسىنىڭ بۇزىلۋى جيٸ كەزدەسەدٸ.
وسىعان بايلانىستى بيىل سەگٸز قىلمىستىق ٸس قوزعالدى. ونىڭ التاۋى بويىنشا سوتقا دەيٸنگٸ تەرگەۋ جالعاسىپ جاتسا, ەكٸ ٸس سوتقا جولدانعان. سونىمەن قاتار, تۇتىنۋعا جارامسىز دەپ تانىلعان 94 كەلٸدەن استام تاعام ٶنٸمٸ اينالىمنان الىندى.
جىل باسىنان بەرٸ قوعامدىق تاماقتانۋ سالاسىنداعى 20 مىڭنان استام نىساننىڭ 600-ٸ تەكسەرٸلٸپ, سانيتارلىق تالاپتاردى بۇزعان كەسٸپكەرلەرگە جالپى سوماسى 50 ملن تەڭگە ايىپپۇل سالىندى. التى نىساننىڭ قىزمەتٸ ۋاقىتشا توقتاتىلدى.
سارحات بەيسەنوۆا اقتٶبە وبلىسىنداعى جاپپاي ۋلانۋ وقيعاسىنا قاتىستى تەرگەۋ ەلٸ جالعاسىپ جاتقانىن ايتتى.
– اقتٶبە وبلىسىندا بارلىعى 188 ادام ۋلاندى, ولاردىڭ بٸر بٶلٸگٸ ەلٸ دە ەم قابىلداپ جاتىر. تەكسەرۋ بارىسىندا مەيرامحانانىڭ رۇقسات قۇجاتتارىنسىز جۇمىس ٸستەگەنٸ, تاعامداردى ساقتاۋ تالاپتارىن بۇزعانى جەنە قىزمەتكەرلەرٸنٸڭ مەديتسينالىق تەكسەرۋدەن ٶتپەگەنٸ انىقتالدى, – دەدٸ كوميتەت تٶراعاسى.
ەسكە سالايىق, بۇعان دەيٸن اقتٶبە وبلىسىندا تويعا قاتىسقان ونداعان ادامنىڭ جاپپاي استان ۋلانعانى تۋرالى حابارلانعان بولاتىن.
