Aqtóbe oblysynyń politseileri Hromtaý qalasynda iz-túzsiz joǵalǵan turǵynǵa qatysty aýyr qylmysty ashty. Tergeý nátijesinde er adamnyń óltirilgeni anyqtalyp, qylmysqa qatysy bar eki adam sottaldy, dep habarlaidy ult.kz.
Polisia.kz málimetinshe, 2024 jylǵy 11 qazanda Hromtaý qalasynyń turǵyny politsiiaǵa jubaiynyń bir aptaǵa jýyq ýaqyt boiy úiine oralmaǵanyn jáne bailanysqa shyqpai jatqanyn aityp, aryzdanǵan.
Habarlama túsken boida jedel-tergeý toby qurylyp, izdestirý jumystary bastaldy. Politseiler joǵalǵan azamattyń aralasatyn ortasyn anyqtap, týystary men tanystarynan, kórshileri jáne áriptesterinen jaýap alǵan. Sonymen qatar onyń bolýy múmkin oryndary tekserilip, jinalǵan málimetter jan-jaqty saralanǵan.
Jedel-izdestirý sharalary barysynda tártip saqshylary joǵalǵan azamattyń eki tanyǵyn anyqtady. Olardyń turǵylyqty jerinde júrgizilgen tintý kezinde asa aýyr qylmysqa qatystylyǵyn dáleldeitin aiǵaqtar tabylǵan. Jinalǵan dálelderdiń negizinde kúdiktiler óz kinálaryn moiyndaǵan.
Politsiianyń málimetinshe, jedel-tergeý toby men tergeýshilerdiń úilesimdi jumysynyń nátijesinde qylmystyń barlyq mán-jaiy anyqtalyp, jetkilikti dálelder jinalǵan. Qylmystyq is tolyq tergelip, zańda belgilengen merzimde sotqa joldanǵan.
2025 jyldyń aqpanynda sot úkimi shyqty. Negizgi aiyptalýshy adam óltirgeni úshin 11 jylǵa bas bostandyǵynan aiyrylsa, ekinshi sottalýshy asa aýyr qylmysty jasyrǵany úshin 4 jylǵa sottaldy.
Politsiia adamnyń habar-osharsyz ketkeni týraly árbir ótinish birden tirkelip, jedel tekseriletinin eske saldy. Sondai-aq mundai jaǵdailarda joǵalǵan adamdardy izdeýge jáne aýyr qylmystardy ashýǵa barlyq qajetti kúsh pen qural jumyldyrylatynyn atap ótti.
