اقتٶبە وبلىسىنىڭ پوليتسەيلەرٸ حرومتاۋ قالاسىندا ٸز-تٷزسٸز جوعالعان تۇرعىنعا قاتىستى اۋىر قىلمىستى اشتى. تەرگەۋ نەتيجەسٸندە ەر ادامنىڭ ٶلتٸرٸلگەنٸ انىقتالىپ, قىلمىسقا قاتىسى بار ەكٸ ادام سوتتالدى, دەپ حابارلايدى ult.kz.
Polisia.kz مەلٸمەتٸنشە, 2024 جىلعى 11 قازاندا حرومتاۋ قالاسىنىڭ تۇرعىنى پوليتسيياعا جۇبايىنىڭ بٸر اپتاعا جۋىق ۋاقىت بويى ٷيٸنە ورالماعانىن جەنە بايلانىسقا شىقپاي جاتقانىن ايتىپ, ارىزدانعان.
حابارلاما تٷسكەن بويدا جەدەل-تەرگەۋ توبى قۇرىلىپ, ٸزدەستٸرۋ جۇمىستارى باستالدى. پوليتسەيلەر جوعالعان ازاماتتىڭ ارالاساتىن ورتاسىن انىقتاپ, تۋىستارى مەن تانىستارىنان, كٶرشٸلەرٸ جەنە ەرٸپتەستەرٸنەن جاۋاپ العان. سونىمەن قاتار ونىڭ بولۋى مٷمكٸن ورىندارى تەكسەرٸلٸپ, جينالعان مەلٸمەتتەر جان-جاقتى سارالانعان.
جەدەل-ٸزدەستٸرۋ شارالارى بارىسىندا تەرتٸپ ساقشىلارى جوعالعان ازاماتتىڭ ەكٸ تانىعىن انىقتادى. ولاردىڭ تۇرعىلىقتى جەرٸندە جٷرگٸزٸلگەن تٸنتۋ كەزٸندە اسا اۋىر قىلمىسقا قاتىستىلىعىن دەلەلدەيتٸن ايعاقتار تابىلعان. جينالعان دەلەلدەردٸڭ نەگٸزٸندە كٷدٸكتٸلەر ٶز كٸنەلارىن مويىنداعان.
پوليتسييانىڭ مەلٸمەتٸنشە, جەدەل-تەرگەۋ توبى مەن تەرگەۋشٸلەردٸڭ ٷيلەسٸمدٸ جۇمىسىنىڭ نەتيجەسٸندە قىلمىستىڭ بارلىق مەن-جايى انىقتالىپ, جەتكٸلٸكتٸ دەلەلدەر جينالعان. قىلمىستىق ٸس تولىق تەرگەلٸپ, زاڭدا بەلگٸلەنگەن مەرزٸمدە سوتقا جولدانعان.
2025 جىلدىڭ اقپانىندا سوت ٷكٸمٸ شىقتى. نەگٸزگٸ ايىپتالۋشى ادام ٶلتٸرگەنٸ ٷشٸن 11 جىلعا باس بوستاندىعىنان ايىرىلسا, ەكٸنشٸ سوتتالۋشى اسا اۋىر قىلمىستى جاسىرعانى ٷشٸن 4 جىلعا سوتتالدى.
پوليتسييا ادامنىڭ حابار-وشارسىز كەتكەنٸ تۋرالى ەربٸر ٶتٸنٸش بٸردەن تٸركەلٸپ, جەدەل تەكسەرٸلەتٸنٸن ەسكە سالدى. سونداي-اق مۇنداي جاعدايلاردا جوعالعان ادامداردى ٸزدەۋگە جەنە اۋىر قىلمىستاردى اشۋعا بارلىق قاجەتتٸ كٷش پەن قۇرال جۇمىلدىرىلاتىنىن اتاپ ٶتتٸ.
