Aqtaýda «Han Tamada» laqap atymen tanymal shoýmen Qasym Óteshev qorǵaý nusqamasyn buzǵany úshin 10 táýlikke ákimshilik qamaýǵa alyndy, dep habarlaidy ult.kz.
Sot materialdaryna sáikes, 13 mamyrda Óteshevke qatysty 30 táýlik merzimge qorǵaý nusqamasy shyǵarylǵan. Qujatqa sáikes oǵan azamattyq jubaiymen bailanys ornatýǵa, telefon shalýǵa, turǵylyqty jerine barýǵa jáne erkinen tys kezdesýge tyiym salynǵan.
Alaida 21 mamyr kúni Aqtaýdaǵy páterlerdiń birinde olardyń arasynda janjal týyndaǵan. Jábirlenýshiniń aitýynsha, shoýmen ony qurbysynyń kózinshe balaǵattap, ar-namysyna tietin sózder aitqan. Bul jaitty sotta kýáger de rastaǵan.
Qasym Óteshev sot barysynda óz kinásin moiyndamai, janjaldy azamattyq jubaiy bastaǵanyn alǵa tartty. Soǵan qaramastan sot onyń kinási ákimshilik hattama, jábirlenýshiniń aryzy jáne kýágerdiń aiǵaqtarymen dáleldengen degen sheshim shyǵardy.
Sot qaýlysyna sáikes, ákimshilik qamaý merzimi 22 mamyrdan bastap esepteledi. Qaýly 2 maýsym kúni zańdy kúshine engen.
Aita keteiik, buǵan deiin Qasym Óteshev pen jubaiyna qatysty jeke sipattaǵy beinejazba áleýmettik jelilerde tarap, qoǵamda qyzý talqylanǵan bolatyn. Keiin atalǵan jazbanyń taralýyna bailanysty ótemaqy óndirý máselesi kóterilgen edi. Endi bul oqiǵaǵa otbasylyq janjalǵa qatysty sot sheshimi qosylyp otyr.
