Aqtaýda jergilikti turǵyn Aqtoty Ahmetqyzy 14 jastaǵy inisiniń eki jasóspirimniń qatygez shabýylyna ushyraǵanyn málimdedi. Onyń aitýynsha, kúdiktiler balany aiaýsyz uryp-soǵyp, bolǵan oqiǵany videoǵa túsirip, keiin jazbany onyń dosyna qorqytý maqsatynda jibergen. Qazir zardap shekken jasóspirim basynan alǵan jaraqatyna bailanysty oblystyq balalar aýrýhanasynda em qabyldap jatyr, dep habarlaidy Lada.kz-ke silteme jasap ult.kz.
Aqtoty Ahmetqyzynyń aitýynsha, 4 tamyz kúni tańerteń inisi 32A shaǵynaýdandaǵy №10 úidiń janyndaǵy dúkenge shyqqan. Sol kezde oǵan shamamen 16-17 jastaǵy eki jasóspirim jaqyndaǵan.
Olardyń aitýynsha, kúdiktiler baladan telefony arqyly sol úide turatyn dosyna qońyraý shalyp, syrtqa shyǵýyn suraýdy talap etken.
Alaida mektep oqýshysy budan bas tartqan soń, jasóspirimder ony soqqyǵa jyǵyp, bolǵan jaitty onyń telefonyna videoǵa túsirgen. Keiin bul jazbany dosyna jiberip, «Eger syrtqa shyqpasań, dosyńnyń da kúni osylai bolady» dep qorqytqan.
«Bul adamshylyqqa jat áreket. Osyndai qatygezdikpen olar erteń adam óltirýge deiin barýy múmkin», – deidi Aqtoty Ahmetqyzy.
Onyń sózinshe, oqiǵadan keiin kúdikti jasóspirimder analarynyń qatysýymen 32V shaǵynaýdanyndaǵy №8 úide ornalasqan politsiianyń tirek pýnktine jetkizilgen.
«Olar kinásin moiyndamady. Onyń ústine, politsiia qyzmetkerleriniń kózinshe olardyń biri: "Iá, men urdym. Qajet bolsa taǵy da uramyn. Ne istei alasyń?" dep aityp, bizge de agressivti minez kórsetti», – deidi ol.
Zardap shekken bala Mańǵystaý oblystyq balalar aýrýhanasyna jetkizilip, kompiýterlik tomografiia jáne basqa da meditsinalyq tekserýlerden ótken. Ápkesiniń aitýynsha, dárigerler onyń basynan aýyr jaraqat anyqtap, shuǵyl túrde aýrýhanaǵa jatqyzǵan.
Sondai-aq Aqtoty Ahmetqyzy politsiianyń tirek pýnktinde olardyń aryzy birden qabyldanbaǵanyn aitty. Onyń sózinshe, birneshe saǵattan keiin ǵana olar qalalyq politsiia basqarmasyna resmi túrde aryz bere alǵan.
«Biz politsiiadan, prokýratýradan, densaýlyq saqtaý basqarmasynan jáne ákimdikten bul oqiǵany nazardan tys qaldyrmai, kinálilerge zań aiasynda eń qatań shara qoldanýdy suraimyz. Eger búgin olar adamdy uryp-soqsa, erteń odan da aýyr qylmysqa barýy múmkin. Eger dál qazir toqtatylmasa, erteń taǵy bir bala zardap shegýi yqtimal», – dedi ol.
