Aqsý qalasynda eki jasar bala úshinshi qabattyń terezesinen qulap, aýyr jaraqat saldarynan kóz jumdy, dep habarlaidy ult.kz.
Qaiǵyly oqiǵa 11 maýsym kúni bolǵan. Sábi úide anasymen birge bolǵan. Anasy túski as daiyndaý kezinde as úige bir sátke shyqqan sátte bala tereze aldyna shyǵyp, moskit toryna súiengen. Tordyń shydamai ketýinen bala tómen qulaǵan.
Oqiǵa ornynan aýyr halde tabylǵan bala aldymen Aqsý qalalyq aýrýhanasy jansaqtaý bólimine jetkizilgen. Keiin sol kúni Pavlodar qalasyna aýystyrylǵan.
Pavlodar oblystyq politsiia departamenti bul derek boiynsha tekserý júrgizilip jatqanyn habarlady. Vedomstvo kámeletke tolmaǵan balanyń qaýipsizdigin qamtamasyz etý mindetteriniń oryndalýy qarastyrylyp jatqanyn atap ótti.
Dárigerlerdiń aitýynsha, bala aýyr bas-mi jaraqatyn alǵan jáne jaǵdaiy óte aýyr bolǵan. Barlyq meditsinalyq sharalarǵa qaramastan, 2023 jyly týǵan búldirshin ota kezinde kóz jumdy.
Pavlodar oblystyq balalar aýrýhanasy mamandarynyń málimetinshe, dárigerler balany aman alyp qalý úshin bar kúshin salǵan, alaida alǵan jaraqattary ómirimen úilespegen.
