AQSh-tyń Kaliforniia shtatyndaǵy Kompton qalasynda segiz jastaǵy Isaiia H.-nyń ólimine qatysty qylmystyq is boiynsha aldyn ala sot tyńdaýy bastaldy. Is boiynsha balanyń anasy, ákesi jáne ájesi aiyptalyp otyr, dep habarlaidy ult.kz.
Tergeý materialdaryna sáikes, Isaiia 2025 jyldyń qazan aiynda alǵan jaraqattarynyń saldarynan kóz jumǵan. Balanyń denesi qaitys bolǵannan keiin tórt kún ótken soń Linvýd qalasyndaǵy páterden tabylǵan. Ol muz salynǵan tońazytqysh-konteinerdiń ishine jasyrylǵan.
Los-Andjeles okrýgi prokýratýrasynyń málimetinshe, bala uzaq ýaqyt boiy anasy Destini Laki Harrison, ákesi Deniel Alberto Monson jáne ájesi Ana Karkamo Zarseno tarapynan zorlyq-zombylyq kórgen bolýy múmkin.
Sottaǵy alǵashqy tyńdaýda balanyń ákesiniń tanysy kýálik berdi. Onyń aitýynsha, otbasy músheleri ony Isaiia aýyryp qaldy degen sebeppen úige shaqyrǵan. Keiin kýáger balanyń soqqyǵa jyǵylǵanyn bilgen.
Kýágerdiń sózinshe, Isaiia qulap, basyn jaraqattaǵannan keiin týystary jedel járdem shaqyrýdan qoryqqan. Osy sebepti balaǵa ýaqytynda meditsinalyq kómek kórsetilmegen.
Keiin balanyń ájesi oǵan Isaiianyń qaitys bolǵanyn aitqan. Kýágerdiń málimdeýinshe, balanyń denesi taǵamdyq plenkaǵa oralǵan. Otbasy ony saqtaý úshin arnaiy tońazytqysh satyp alǵan. Sondai-aq otbasy músheleri odan máiitten qutylýǵa kómektesýin suraǵan.
Sotta Isaiianyń ómiriniń sońǵy kezeńindegi jaǵdaiy da sóz boldy. Balanyń ápkesiniń aitýynsha, otbasy onyń salmaǵyna alańdap, tamaqtanýyn shektegen. Denesi tabylǵan kezde balanyń salmaǵy shamamen 29,5 keli bolǵan.
Úsh aiyptalýshyǵa da kisi óltirý, azaptaý jáne balanyń ólimine ákep soqqan qatygez áreketter jasaý boiynsha aiyp taǵylǵan. Al balanyń ákesi men ájesi onyń óliminen keiin qylmysty jasyrýǵa qatysty qosymsha aiyppen jaýapqa tartylyp otyr.
Aiyptalýshylar sotta kináli dep tanylsa, árqaisysy 32 jyldan ómir boiyna deiin bas bostandyǵynan aiyrylýy múmkin.
Aita keteiik, AQSh-tyń Michigan shtatynda bir otbasynyń segiz múshesi qaza tapqan qaiǵyly oqiǵa boldy. Politsiianyń málimetinshe, er adam áielin jáne alty balasyn atyp óltirip, keiin úidi órtep, ózi de sýitsid jasaǵan.
