Almaty qalasyndaǵy №126 mamandandyrylǵan litseidiń 11-synyp oqýshysy sońǵy qońyraýǵa birneshe kún qalǵanda kóz jumdy. Qaiǵyly oqiǵa 23 mamyrǵa qaraǵan túni Áýezov aýdanynda bolǵan, dep habarlaidy Ult.kz Orda.kz saityna silteme jasap.
Orda.kz málimetinshe, marqum bilim ordasyndaǵy úzdik oqýshylardyń biri bolǵan. Onyń qazasy týystary men ustazdary úshin kútpegen jaǵdaiǵa ainalyp, kópshilikti eseńgiretip otyr.
Mektep direktory Aijan Ábýevanyń aitýynsha, jasóspirim oqý úlgerimi joǵary, bolashaǵynan zor úmit kúttirgen shákirtterdiń qatarynda bolǵan.
– Ol óte jaqsy oqydy. Keiin belgili bolǵandai, AQSh pen Qytaidaǵy joǵary oqý oryndarynan shaqyrtý alǵan eken. Bul týraly mektep ujymy jerleý rásiminde ǵana bildi. Sonymen qatar qatarlas synyptaǵy qyzben qarym-qatynasta bolǵan, – dedi direktor.
Túlek Ulttyq biryńǵai testileýde de joǵary nátije kórsetken. Qańtar aiyndaǵy UBT-da 119 ball jinap, keiingi synaqtardyń birinde 134 ball alǵan. Ol mamyr aiynda negizgi emtihan tapsyrýy tiis edi. Sondai-aq matematika páninen túrli olimpiadalarǵa turaqty qatysyp júrgen.
Mektep ákimshiliginiń málimetinshe, qaiǵyly oqiǵaǵa deiin onyń minez-qulqynan alańdatarlyq eshqandai belgi baiqalmaǵan. Oqiǵa qarsańynda, 22 mamyr kúni oqýshy sońǵy qońyraýǵa arnalǵan vals biiniń daiyndyǵyna qatysyp, kóterińki kóńil kúide júrgen.
– Sońǵy qońyraý saltanatynda muǵalimin bige shaqyratynyn aityp júrdi. Sol kúni úiine kelip, anasyna birge et jeýdi usynǵan. Alańdarlyq eshteńe bolmaǵan, – deidi mektep direktory.
Belgili bolǵandai, marqum otbasyndaǵy úshinshi bala bolǵan. Qazirgi ýaqytta oqiǵanyń barlyq mán-jaiy anyqtalyp jatyr. Tergeý aiasynda túrli nusqalar, onyń ishinde otbasylyq jaǵdailarǵa qatysty boljamdar da qarastyrylýda.
Synyp jetekshisiniń aitýynsha, oqýshynyń ata-anasy mektep ómirine belsendi aralasyp, jinalystarǵa turaqty qatysqan. Muǵalimder tarapynan otbasyda qandai da bir kúrdeli másele bar degen belgi baiqalmaǵan.
Quzyrly organdar oqiǵaǵa qatysty tergeý jumystaryn jalǵastyryp jatyr.
