Apple-ǵa seriktes taǵy bir qytailyq kompaniia "uiǵyrlardy qanady" dep aiyptaldy. Quqyq qorǵaýshylar deregine súiengen Washington Post basylymy 29 jeltoqsanda osylai dep habarlady.
Tech Transparency Project jobasy aiasynda saraptalǵan qujattarǵa súiengen basylym Apple kompaniiasymen uzaq ýaqyttan beri áriptestik ornatqan Lens Technology Qytaidyń batys aimaǵynan ákelingen myńdaǵan uiǵyr azamatyn májbúrlep jumysqa jekken dep jazdy.
Lens Technology - Qytaida uiǵyrlardy qanaýǵa atsalysty dep aiyptalǵan Apple-ǵa seriktes besinshi kompaniia. Qytailyq kompaniia sonymen birge Amazon men Tesla-ny da jabdyqtaǵan.
Apple resmi ókili Djosh Rozentok kompaniianyń aiyptaýlardy joqqa shyǵarǵanyn rastady. Lens Technology ázirge túsinikteme bermegen.
Pekindegi syrtqy ister ministri Qytaida "eńbek qanaý" joǵyn málimdep, ony aityp júrgender "jeke maqsatty" kózdeidi degen.
Qytai biligi buǵan deiin de "jumysshylardy almastyrý" baǵdarlamasy aiasynda túrkitildi myńdaǵan musylmandy zaýyttarǵa jiberip, kúshtep jumysqa saldy dep synǵa ushyraǵan. Pekin "bul baǵdarlama basqa aimaqtarǵa jiberilgen uiǵyrlarǵa jańa múmkindik syilaidy" dese, quqyq qorǵaý uiymdary jumysshylardy májbúrlep jibergenin aitqan.
BUU Qytaidyń Shyńjańda millionǵa jýyq etnikalyq uiǵyr, qazaq jáne basqa da musylmandardy "saiasi tárbie lagerine" qamaǵanyn málimdegen. Bastapqyda mundai aqparatty teristegen Pekin keiin ony "ekstremizmge qarsy shara" dep túsindirgen jáne saiasi lagerlerdi "til úirenip, kásipke baýlityn" ortalyqtar dep ataǵan.
Quqyq qorǵaýshylar men lagerde tutqynda bolǵan adamdar ortalyqtarda qysym men azaptaý baryn aitqan.
