Foto: Májilis baspasóz qyzmetinen
Búgin sot 24 jylǵa úkim kesken eks-ministr Qýandyq Bishimbaevtyń apelliatsiialyq soty tikelei efirde ótip jatyr. ULT.kz tilshisi Májilis depýtaty Abzal Quspannan apelliatsiialyq sotta Q. Bishimbaev jazadan qutylyp ketýi múmkin be ekenin surady.
"Negizgi qylmystardyń kópshiligi lotentti bolady, iaǵni jasyryn. Biraq kei bir qylmystar ashyq kórinip turady. Adam ólimi bolyp otyr, qalaisha ol aqtalýy múmkin? Al qanshalyqty saralanýy durys degen basqa másele. Bul iste protsesstik-zańnamalyq talaptar saqtaldy ma, joq pa, sol turǵyda máni boiynsha qaralady. Biraq aqtalyp ketýi múmkin emes", - dedi Abzal Quspan.
Buǵan deiin "Qýandyq Bishimbaev aqyl-esi durys emes dep tanylyp, jaýapkershilikten qutylýy múmkin" degen de pikirler bolǵan. Depýtat bul týraly ne oilaitynyn aitty.
"Oǵan eki negizde aita alamyn. Birinshiden, ministr dárejesinde, Úkimet múshesinde bolǵan adam barlyq tiisti tekserýlerden ótedi. Ekinshiden, buǵan deiin de qylmystyq jaýapkershilikke tartyldy ǵoi? Sol kezde barlyq tiisti tekserýlerden ótkizildi. Qajet bolatyn bolsa, saraptama jasalady. Ondai ýáj keltirilýi úshin saraptama júrgizilýi kerek. Kúni búginge deiin saraptama taǵaiyndalyp, aqyl-esiniń durystyǵyna kúdik-kúmán týyndap, saraptama jasalǵanyn estimeppin. Aqyl esine bailanysty jaýapkershilikten qutylady dep oilamaimyn", - dedi depýtat A. Quspan.
Aita keteiik, Qazaqstannyń burynǵy Ulttyq ekonomika ministri Qýandyq Bishimbaev azamattyq áieli Saltanat Núkenovany asqan qatigezdikpen uryp óltirdi degen kúdikke ilinip, 2023 jyly qarashada qamaýǵa alynǵan. Sot protsessi biyl naýryz, sáýir ailarynda tikelei efir arqyly ótken. Bul sot isi Qazaqstan ǵana emes, álemde rezonans týdyryp, sot otyrystaryn tikelei efirde milliondaǵan adam baqylap otyrǵan bolatyn. Sot Qýandyq Bishimbaevqa 24 jyl, al onyń týysy, osy iske qatysy bar dep tanylǵan Baqytjan Baijanovqa 5 jyl bas bostandyǵynan aiyrý jazasyn kesti.
