Almaty túbinde apatqa ushyraǵan ushaqtan aviatsiialyq otyndy qotarý jumystary júrgizilip jatyr.
Bul jaiynda QR IIM Tótenshe jaǵdailar komitetinen málim etti, dep habarlaidy "Ult aqparat".
Vedomstvo málimetinshe, janýarlar jáne ósimdikti qorǵaý qyzmetkerleri ushaq qulaǵan aýmaqta veterinarlyq-sanitarlyq tekserý jumystaryn júrgizgen. Nátijesinde Talǵar aýdanyna qarasty Gúldana eldi mekeniniń jeke sektor aýmaǵynda jáne ushaq qulaǵan jerde ólgen janýarlardyń óleksesi tabylǵan joq. Atalǵan aýmaqtaǵy epizootikalyq ahýal qolaily.
«QR IIM Tótenshe jaǵdailar komitetiniń qutqarýshylary Almaty qalalyq qutqarý qyzmeti qutqarýshylarymen birge tótenshe oqiǵa bolǵan jerde gidravlikalyq quraldardyń kómegimen ushaqty bólshekteý jumystaryn júrgizip jatyr. Sonymen qatar áýe kemesiniń oń jaq qanatyndaǵy baktan aviatsiialyq otyndy qotarý jumystary da júrgizilýde. 1 tehnika (áýejaidyń 8 tonnalyq benzovozy) men 4 maman jumyldyrylǵan. Saǵat 17-00-degi jaǵdai boiynsha baktaǵy 4 875 litr aviatsiialyq otynnyń 2 myń litri qotaryldy. Órt shyǵýyna jol bermeý úshin kóbik atqylaýǵa ATs-5 jáne ATs-8 órt sóndirý tehnikasy qoiylǵan», - dep atap ótedi komitetten.
Taratylǵan aqparatqa qaraǵanda, TJK jedel shtabynda IIM, IIDM, DSM, EM, Ulttyq ulan ókilderi júr. Shuǵyl psihologiialyq kómek kórsetý úshin qaýyrt jeli telefondarynyń jumysy uiymdastyrylǵan. Saǵat 17-00-degi jaǵdai boiynsha qaýyrt jelige 1 344 qońyraý túsken.
«TJK psihologtary zardap shekken 69 azamattyń týystaryna, Densaýlyq saqtaý ministrliginiń psihologtary statsionarlyq em alyp jatqan 47 zardap shegýshige pshologiialyq kómek kórsetti», - delingen taratylǵan aqparatta.
