Resei áskeriniń 16 naýryzda Mariýpoldegi drama teatrǵa jasaǵan áýe soqqysynan shamamen 600 adam qaza tapty.
Teatr ǵimaratyna myńǵa jýyq adam tyǵylǵan, dep jazdy Associated Press. Agenttik osy oqiǵany arnaiy zerttegen.
Jýrnalister áýe soqqysynan aman qalǵan 23 adammen, qutqarýshylarmen, teatr ǵimaratyn jaqsy biletindermen sóilesip, soqqyǵa deiin jáne keiin túsirilgen sýretter men videolardy saraptady. Bul aqparat teatrdyń 3D-nusqasyn jasaýǵa qajet boldy. Kýágerler sonyń kómegimen adamdar teatrdyń qai jerlerin panalaǵanyn jýrnalisterge kórsetti.
16 kýáger ǵimaratta adam kóp bolǵany sonsha, árbir úsh sharshy metrge bir adamnan ornalasqanyn aitty. Adamdar bólmelerde, dálizderde otyrǵan. Ǵimarat mańyndaǵy ashanada júzge jýyq adam bolǵan. Olardyń bári qaza tapty.
Soqqydan aman qalǵan eki adam teatrda 300-ge jýyq adam opat boldy dep eseptegen. Qala biligi de áýeli osy málimetti jariialaǵan. Mariýpol politsiiasynyń bir qyzmetkeri men Qyzyl Krest ókili áýe soqqysynan kem degende 500 adam qaza tapty dep boljady. Associated Press máiitterdiń keibirin reseilik áskeriler alyp ketken dep topshylady.
Agenttik zertteýshileri soǵys jaǵdaiynda naqty qansha adam qaza tapqanyn anyqtaý múmkin emestigin eskertti.
Áýe soqqysy qarsańynda spýtnikten túsirilgen sýrette teatr ǵimaraty aldynda "deti" degen jazý anyq kórinip tur. EQYU teatrǵa jasaǵan shabýyldy halyqaralyq gýmanitarlyq quqyqty buzý, áskeri qylmys dep atady.
Resei qorǵanys ministrligi Mariýpol drama teatryn osy ǵimaratqa jasyrynǵan ýkrain áskerileri jardy dep málimdedi, biraq dálel usynbady.
Mariýpol – Azov teńizindegi portty qala. Jergilikti bilik kem degende 20 myń adam qaza tapqanyn habarlady. Qaladaǵy qurylystardyń 90 paiyzy qiraǵan.
