Kollaj: Tengrinews.kz
Antikor qyzmetkerlerin qýǵan patrýldik politsiia ekipajy Qaraǵandy oblysyndaǵy qyzmetinen bosatyldy. Politseilerdiń biri beineúndeý jasady, - dep habarlaidy Tengrinews.kz.
Videoda politsei ózin Jańabek Jumabekpin deidi. Onyń aitýynsha, 2019 jyldan bastap Jańaarqa aýdanynyń politsiia bóliminde jumys isteidi. Politseidiń sózinshe, Antikor qyzmetkerin qýǵanna keiin ol qyzmetinen bosatylǵan.
"29 qańtarda Sybailas jemqorlyqqa qarsy qyzmet qyzmetkeri mas kúide kólik júrgizip, jol apatyna ushyrady, keiin oqiǵa ornynan qashyp ketti. Ony toqtatqan kezde alkogol deńgeiin ólsheitin qurylǵyǵa úrleýden bas tartty. Qyzmettik ókiletin asyra paidalanyp, qyzmetkerlerdi qorqytýǵa tyrysty, olarǵa bylapyt sóz aitty. Bul videoǵa jazylǵan. Osydan keiin ol qan tapsyrdy, ortasha mas ekeni anyqtaldy. Biraq osyǵan qaramastan, basshylyq bizden hattama jasamaýdy jáne nomenklatýralyq iske jazbaýdy talap etti. Olardyń biri - ustalǵan adamnyń qudasy. Biz bolǵan oqiǵany jasyrmadyq, ony joǵary basshylyqqa jetkizdik. Osydan keiin meni jáne meniń seriktesimdi qyzmetten zańsyz bosatty", - deidi politsiia qyzmetkeri óziniń videoúndeýinde.
Sondai-aq, politsei Antikor qyzmetkerine qatysty áli kúnge deiin eshqandai shara qoldanylmaǵanyn málimdedi. Ol jaǵdaidy anyqtap, ádilet ornatýdy surady. Sonymen qatar, politsiia qyzmetkeri buǵan deiin eshqandai tártiptik jazaǵa tartylmaǵanyn jáne adal jumys istep kelgenin aitty.
Qaraǵandy oblysy politsiia departamentiniń baspasóz qyzmeti politseidiń videoúndeýine túsinik berdi. Vedomstvo ókilderi atqaryp otyrǵan laýazymynan bosaýy onyń jumystan shyqqany emes ekenin atap ótti.
"Jańaarqa aýdanynyń politsiia bóliminiń qyzmetkerlerine qatysty qyzmettik tergeý júrgizildi. Oǵan ákimshilik is júrgizý boiynsha qyzmettik materialdar men dáleldemeler túsirilgen beineojeton jazbasyn taratqany, normativtik emes leksika qoldanǵany jáne memlekettik qyzmetshiniń etikasyn buzǵany sebep boldy. Tergeý nátijeleri boiynsha patrýldik politsiia ekipajy tártiptik jazaǵa tartylyp, atqaryp otyrǵan laýazymynan bosatyldy. Bul qyzmetkerlerden basqa, olardyń tikelei basshylary da laýazymdarynan bosatyldy", - dep habarlady vedomstvo ókilderi.
Sondai-aq, baspasóz qyzmetindegiler politsei artynan qýǵan 38 jastaǵy júrgizýshige qatysty ákimshilik material sotqa jiberilgenin qosty.
Eske salaiyq, oqiǵa Jańaarqa aýdanynda bolǵan. Video avtorlary jasyrynyp qalýǵa tyrysqan kólikte Sybailas jemqorlyqqa qarsy qyzmettiń jezqazǵandyq qyzmetkeri mas bolǵanyn aityp otyr.
